Украина билан муносабатларда АҚШнинг янги геосиёсий манёврлари кузатилмоқда. Трамп жамоасининг Порошенко ва Тимошенко билан учрашуви Зеленскийга сигнал сифатида талқин қилинмоқда. Бу фонда Украинада сайлов эҳтимоли ҳақида тахминлар кучаймоқда. Шу билан бирга, Европа хавфсизлик архитектураси бўйича янги муҳокамалар бошланган – 800 миллиард етарлими? “Геосиёсат”да таҳлилчилар Шуҳрат Расул, Ойбек Сирожов ва Абдували Сойибназаров мавзу юзасидан ўз фикрлари билан бўлишди.
Трамп жамоаси вакиллари Украина собиқ президенти Петро Порошенко ва собиқ бош вазир Юлия Тимошенко билан учрашиши сабаби нимада?
Шуҳрат Расул: Биз Трамп ва Зеленский муносабатлари совуқ эканини биламиз. Америкаликларнинг Юлия Тимошенко ёки Порошенко билан учрашишдан мақсади ўзига хос Зеленскийга чақириқ, мана шу фонда кўплаб экспертлар Украинада энди сайлов бўлиши мумкинлигини айтяпти.
Лекин Порошенко қанчалик Зеленскийга мухолиф бўлмасин, ҳозирги вазиятда мамлакат раҳбарини қўллашини билдириб, уруш вақтида сайловлар ўтказилмагани маъқуллигини айтди. Шу билан бирга у АҚШ билан Зеленскийга қарши бирор ҳаракатни муҳокама қилмаганини билдирди.
Бундан ташқари халқ орасида ўз мавқейига эга бўлган Валерий Залужний ҳам мамлакат бирдамлигини қўллаб, Трампнинг сиёсатини танқид қилиб чиқди ва Украина бирдамлигини дунёга кўрсатди дейиш мумкин.
Европа 800 млрд доллар эвазига қайта қуроллантиришдан кўра НАТОга шу маблағни сарфлагани мақбул эмасми?
Ойбек Сирожов: АҚШ ўрнини босиш мақсадида хавфсизлик соябонини яратишга шунча маблағ сарфланиши назарда тутиляпти, ундан ташқари бундай платформа учун камида 10 йил вақт керак бўлади.
Ҳар қандай шароитда Европа Иттифоқи англаб етяптики, хавфсизлик билан боғлиқ бўлган масалаларда маблағ ажратиш ва бу борадаги имкониятларни кучайтириш керак деган таклифлар илгари суриляпти.
Масалан, Германияда янги канцлер Мерц чиқишларида ҳам худди шу нарсага алоҳида урғу беряпти. Франция ҳам бу борада ташаббуслар қилаётганини кўриб турибмиз.
Абдували Сойибназаров: Евроиттифоқ ичида келишмовчиликлар бор, масалан, Венгрия ва Словакия каби давлатлар қарор қабул қилишда Москвага хайрихоҳлиги сабаб консенсусга келолмаслиги мумкин.
Иқтисодий омиллар сабаб иттифоқда бўлиниш юз бериши мумкин. Франция, Германия, Италия каби йирик иқтисодий имкониятга эга давлатлар бундай ташаббусни қўллаши мумкин. Лекин ўйлайманки, Марказий ва Шарқий Европа давлатлари Европа Иттифоқидан кўра кўпроқ Қўшма Штатларга таянади ва унга ишонади. Бу нуқтаи назардан, улар барибир Америка Қўшма Штатларининг хавфсизлик соябонида қолиш тарафдори бўлиб кўринади.
Ctrl
Enter
Хато топдИнгизми
Иборани ажратиб Ctrl+Enter тугмасини босингМавзуга оид янгиликлар
