Эрон ва АҚШ ўртасидаги таранг муносабатлар фонида Теҳрон расман янги тинчлик ташаббуси билан чиқди. Эрон ҳукумати АҚШга урушни тўхтатишга қаратилган 14 банддан иборат режани тақдим этди.
Маълум қилинишича, ушбу ҳужжат аввалроқ Вашингтон томонидан илгари сурилган 9 бандлик таклифга жавоб сифатида ишлаб чиқилган. АҚШ режасида икки ойлик вақтинчалик сулҳ кўзда тутилган бўлса, Эрон бу масалани чўзмасдан, бир ой ичида тўлиқ ҳал этиш лозимлигини таъкидламоқда.
Эрон қандай шартларни илгари сурди?
Теҳрон ўз таклифида бир қатор муҳим талабларни қўйган. Жумладан:
- АҚШ томонидан ҳужум қилмаслик кафолатини бериш;
- Америка қўшинларини чегара ҳудудларидан чиқариш;
- ҳарбий-денгиз блокадасини бекор қилиш;
- музлатилган активларни қайтариш;
- иқтисодий санкцияларни олиб ташлаш.
Бундан ташқари, Эрон етказилган зарар учун товон тўлашни, минтақадаги ҳарбий ҳаракатларни тўхтатишни, жумладан Исроилнинг Ливанга қилган ҳужумларини бекор қилишни талаб қилган. Шунингдек, Ҳормуз бўғози бўйича янги ишлаш механизмини жорий этиш таклифи ҳам илгари сурилган.
Трампнинг муносабати
Дональд Трамп ушбу режани яқин кунларда кўриб чиқишини маълум қилди. Бироқ у таклиф қабул қилиниши эҳтимоли паст эканини таъкидлаб, Эроннинг ўтмишдаги ҳаракатларини танқид қилди.
Музокаралар ва вазият ривожи
Маълумотларга кўра, агар Вашингтон ушбу режага ижобий баҳо берса, Эрон яқин вақт ичида Исломободда навбатдаги музокараларни ўтказишга тайёр.
Эслатиб ўтамиз, томонлар ўртасидаги зиддиятлар 28 февраль куни кучайган эди. Кейинчалик 8 апрель куни ўт очишни тўхтатиш бўйича келишув эълон қилинган. Бироқ илк музокаралар самарасиз якунланган ва вазият яна кескинлашган.
Айни пайтда дунё ҳамжамияти ушбу музокаралар қандай якун топишини диққат билан кузатмоқда.
