АҚШ Президенти Дональд Трампнинг маълум қилишича, Nvidia компаниясининг энг илғор сунъий интеллект чиплари Хитой ва бошқа мамлакатларга етказиб берилмайди. Ушбу маҳсулот аввало Америка бозорига тақдим этилади.
Гап Nvidia'нинг Blackwell сериясига мансуб чиплар ҳақида бормоқда. Бу график процессорлар асосан сунъий интеллект ва юқори самарадорликка эга ҳисоб-китоблар учун мўлжалланган.
Шу билан бирга, Трамп Хитойга камроқ қувватга эга Blackwell чипларини етказиб бериш масаласини кўриб чиқишга тайёрлигини билдирди. Унинг таъкидлашича, Nvidia билан ҳамкорлик қилишига Пекин учун рухсат берилади.
Бироқ, ушбу ташаббус АҚШ сиёсий доираларида танқидга учради. Айрим сиёсатчилар Хитойга бундай чипларнинг етказиб берилиши Пекиннинг ҳарбий салоҳиятини ошириши ва сунъий интеллектни ривожлантиришни тезлаштириши мумкинлигидан хавотир билдирмоқда.
Reuters маълумотига кўра, июл ойида Трамп маъмурияти сунъий интеллектни ривожлантиришга оид янги режани тақдим этган эди. Ушбу режа экологик меъёрларни юмшатиш ва ушбу технологияни иттифоқчиларга кенгроқ экспорт қилиш орқали АҚШнинг муҳим технологияларда Хитойдан устунлигини сақлаб қолишни мақсад қилган.
