Илон Маск бошчилигида ишлаган АҚШ Федерал ҳукуматининг самарадорлигини ошириш бўйича департаменти (DOGE) муддатидан олдин ёпилди, деб хабар бермоқда Reuters. Дастлаб ушбу департаментни 2026 йил июл ойида ёпиш режалаштирилган эди.
АҚШ Кадрлар бошқармаси (OPM) директори Скотт Купор журналистларга DOGE энди марказлашган тузилма бўлмаслигини маълум қилди. АҚШ Президенти Дональд Трамп томонидан августда имзоланган фармонга биноан, департаментнинг икки юқори даражадаги ходими бошқа ташкилотга ўтказилган.
DOGEнинг вақтинча администратори Эми Глисон март ойида Соғлиқни сақлаш ва ижтимоий хизматлар вазирининг маслаҳатчиси этиб тайинланган. Оқ уй департаментнинг ёпилиши белгиланган мақсадлардан воз кечишни англатмаслигини таъкидлади.
"Президент Трампга федерал ҳукуматда исрофгарчилик, фирибгарлик ва суистеъмолликларни камайтириш бўйича аниқ топшириқ берилган ва у ушбу мажбуриятни фаол равишда бажаришда давом этмоқда", деди матбуот котиби Лиз Хьюстон. Бундан ташқари, федерал идораларга ишга қабул қилиш бўйича илгари жорий этилган мораторий ҳам бекор қилинган.
Агентликнинг қайд этишича, DOGEнинг йўқ бўлиши унинг ташкил топган пайтидаги эътибордан кескин фарқ қилади.
Меҳмон гуруҳидаги фойдаланувчилар ушбу мақолага изоҳ қолдира олмайди.
