Эронда сўнгги кунларда кучайган норозилик чиқишлари фонида олий раҳбар Али Хоманаий халқни якдилликка, бир тан-у бир жон бўлишга чақирди. Anadolu хабарига кўра, оятулло мамлакатдаги вазият юзасидан кескин баёнот бериб, намойишчилар ва ташқи таъсир мавзусига ҳам тўхталган.
Хоманаийнинг таъкидлашича, кўчаларга чиққанлар “узоқни кўра олмайдиган”, вазиятни чуқур англамайдиган инсонлар бўлиб, улар АҚШ президенти Доналд Трампга ишониб, ҳатто уни рози қилиш учун ҳаракат қилаётганини айтган. Олий раҳбар Трамп ҳақида қаттиқ гапириб, унинг сиёсий қадамлари ва риторикасини иккиюзламачилик сифатида баҳолаган.
«АҚШ президентининг қўллари мингдан ортиқ эронликларнинг қони билан бўялган. Ва энди у ўзини Эрон халқини қўллаб-қувватлаётганини даъво қилмоқда», — деган Хоманаий.
Шу билан бирга, Эрон олий раҳбари Трампнинг Ислом Республикасига нисбатан сиёсатига танқидий ёндашиб, тарихий мисолларни келтирган. У ўтмишда ағдарилган “золимлар ва такаббурлар”нинг тақдирини эслатар экан, улар қаторида охирги Эрон шоҳи Муҳаммад Ризо Паҳлавий мисолини тилга олиб, бу каби сценарийлар такрорланиши мумкинлигига ишора қилган.
Эслатиб ўтиш жоиз, 9 январ куни Доналд Трамп агар иқтисодий аҳволдан норози бўлган намойишчилар ўлдирилса, Эронга нисбатан “жуда кучли зарба” беришини очиқ айтган.
Норозилик чиқишлари эса 28 декабр куни маҳаллий валютанинг қадрсизланиши ортидан бошлангани қайд этилмоқда. Намойишлар фонида хавфсизлик чоралари ҳам кучайтирилган: полиция томонидан кўздан ёш оқизувчи газ ва пневматик қуроллардан фойдаланиш каби усуллар қўллангани хабар қилинган.
Қисқаси, Эрондаги вазият ички иқтисодий босим ва ташқи сиёсий баёнотлар кесишган нуқтага келиб қолган. Бир томонда — кўчадаги норозилик, иккинчи томонда — қатъий баёнотлар ва таҳдидли огоҳлантиришлар. Энди энг катта савол: бу кескинлик юмшайди-ми ёки янги босқичга ўтадими?
“Zamin”ни Telegram'да ўқинг!
