Яқин Шарқдаги кескин вазият фонида янги геосиёсий қадам кузатилди. Axios нашри хабар беришича, Исроил Бирлашган Араб Амирликларига ўзининг машҳур «Темир гумбаз» ҳаво мудофаа тизимини юборган.
Манба маълумотларига кўра, ушбу қарор шахсан Бинямин Нетаняху томонидан қабул қилинган. У Муҳаммад бин Зайд Ол Ноҳайён билан телефон орқали мулоқот ўтказганидан сўнг бу ташаббусни амалга оширган. Бу воқеа Эрон билан боғлиқ ҳарбий кескинлик бошланганидан кўп ўтмай содир бўлган.
Қайд этилишича, Бирлашган Араб Амирликлари Исроилдан «Темир гумбаз» тизимини қабул қилган илк хорижий давлатга айланди. Бу эса икки давлат ўртасидаги ҳарбий ва стратегик ҳамкорлик янги босқичга чиққанини кўрсатади.
Нашр келтирган маълумотларга кўра, амирликлар расмийларидан бири бу қадамни юқори баҳолаб, «Биз буни ҳеч қачон унутмаймиз. Бу асл дўстимиз ким эканлигини кўрсатган ҳақиқий кашфиёт бўлди» дея таъкидлаган.
Шу билан бирга, вазият жиддийлигича қолмоқда. БАА мудофаа вазирлиги маълумотларига кўра, Эрон томонидан амирликлар ҳудудига 550 га яқин баллистик ва қанотли ракеталар, шунингдек 2200 дан ортиқ дронлар йўналтирилган.
Қисқача айтганда, минтақада ҳарбий технологиялар ва альянслар янги даражага чиқмоқда. «Темир гумбаз»нинг БААга жойлаштирилиши эса келгуси геосиёсий мувозанатга жиддий таъсир кўрсатиши мумкин.
Read “Zamin” on Telegram!
