131
Халқаро олимлар жамоаси экранлардан кўк нурни тўсиб қўювчи «компьютер кўзойнаклари» хусусиятларини синовдан ўтказди ва улар аслида кўзни ҳимоя қилиш учун фойдасиз деган хулосага келди.
Мелбурн университети (Австралия), Монаш университети (Австралия) ва Лондон Сити университети (Буюк Британия) тадқиқотчилари олти мамлакатдаги ҳамкасбининг 17 та мақоласини ўрганиб чиқди. Тадқиқот кўламига қараб, 5 нафардан 156 нафаргача киши бир кундан беш ҳафтагача кузатиб борилди.
Маълум бўлишича, уларнинг ҳеч бирида кўк нурни тўсувчи кўзойнакнинг самарали экани ҳақида ишончли далиллар йўқ. Улар кўзнинг умумий ҳолатига таъсир қилмайди, уйқу сифатини яхшиламайди ва рекламаларда айтилганидек, кўзнинг визуал қобилиятини оширмайди.
«Инсон кўзи сунъий манбалардан, масалан, компьютер экранидан оладиган кўк ёруғлик миқдори табиий кундузги ёруғлик нурининг мингдан бир қисмини ташкил қилади. Шуни ҳам ёдда тутиш керакки, ушбу кўзойнаклар маълум бир маҳсулотга қараб, фақат 10-25 фоиз кўк нурни фильтрлаши мумкин. Янада самарали бўлиши учун уларнинг линзаси худди қаҳрабо каби тўқ сарғиш рангга эга бўлиши керак, бу эса рангларни илғаш қобилиятига сезиларли таъсир қилади», деди Шумер Сингх, тадқиқотнинг етакчи муаллифи.
Олимлар қатъий хулосалар чиқариш учун кенгроқ тадқиқот ўтказиш кераклигини тан олишади. Мисол учун, кўзойнакни узоқ муддат ишлатишнинг самараси бўйича ҳеч қандай хулоса йўқ. Бироқ, оралиқ натижалар кўзларни кўк нурдан ҳимоя қилиш - кўзойнак сотувчилар томонидан ихтиро қилинган афсона эканини тушуниш учун етарли.
«Замин»ни Telegram’да ўқинг!
17:32, 13-04-2025
