АҚШнинг собиқ вице-президенти Камала Ҳаррис келажакда президентликка номзодини яна қўйиши мумкинлигини билдириб, сиёсий саҳнада яна фаол иштирок этиш эҳтимолини очиқ қолдирди. Бу ҳақда сиёсатчи BBC нашрига берган суҳбатида сўз юритди.
Ҳарриснинг таъкидлашича, у ҳали сиёсатдан бутунлай четга чиқишни режалаштираётгани йўқ, аксинча, жамиятга хизмат қилиш унда қонда бор туйғу эканини қайд этди.
“Мен бутун фаолиятимни одамларга хизмат қилиш билан ўтказганман ва бу менинг табиатимда бор. Буни ўзимдан айиролмайман”, — деди у интервью давомида.
Ундан “Қачондир Оқ уйни бошқарадиган биринчи аёл бўла оласизми?” деб сўралганида эса Ҳаррис шундай жавоб қайтарди: “Эҳтимол, ҳа”. Бироқ у ҳозирча президентликка расмий номзод бўлиш ёки бўлмаслик ҳақида якуний қарор қабул қилмаганини таъкидлади.
Маълумот учун, АҚШдаги навбатдаги президентлик сайлови 2028 йилда ўтказилади. Шу муносабат билан Ҳаррис сиёсий фаолиятда янги босқични бошлаш ёки бошқа йўналишда фаолият юритиш ҳақида ҳали ўйлаб кўраётганини айтди.
“Хизмат қилишнинг кўп усуллари бор, аммо мен келажакда айнан нимани танлашимни ҳали ҳал қилмаганман”, — дея қўшимча қилди у.
Ҳаррис шунингдек, ўз номзоди Демократик партия учун аҳамиятсиз ёки кучсиз деб ҳисобланиши ҳақидаги фикрларга жавоб қайтарди. Унинг сўзларига кўра, у сўров ва таҳлилларга эмас, балки ишонч ва ҳаракатга таянади.
“Агар мен фақат сўров натижаларига қараганимда, эҳтимол, биринчи ёки иккинчи лавозимга ҳеч қачон номзодимни қўймаган бўлардим. Ҳозир эса мен бу ерда турибман”, — деди Ҳаррис.
Суҳбат давомида у амалдаги президент Доналд Трамп фаолиятини ҳам танқид қилди. Ҳарриснинг фикрича, Трамп федерал идораларни шахсий мақсадларида қўллаб, айрим бизнес ва ташкилот раҳбарларини босим остида қолдирган.
“Кўпчилик одамлар ҳали у ҳокимиятга қайтмасидан олдиноқ унинг олдида тиз чўкди. Улар ҳокимиятга яқин бўлишни ёки жавобгарликдан қочишни хоҳлашди”, — деди Камала Ҳаррис.
Эслатиб ўтамиз, сўнгги президентлик сайловида Камала Ҳаррис 48,43 фоиз овоз тўплаган, аммо Доналд Трамп ғалаба қозонганди. Шу боис энди у сиёсий реванш ҳақида жиддий ўйлаётгани кузатилмоқда.
