Суперлиганинг 26-туридан ўрин олган «Қўқон-1912» — «Навбаҳор» (2:0) учрашувидан сўнг наманганликлар бош мураббийи Шерзод Жўраев матбуот анжуманида иштирок этиб, жамоа ўйини ва натижа ҳақидаги фикрларини билдириб ўтди.
— Бугунги баҳс мухлислар учун том маънода қизиқ ва жонли бўлди, — деди мураббий. — Ҳар икки жамоа ғалаба учун ҳаракат қилди, майдонда кескин кураш кечди. Энг муҳими, наманганлик ишқибозлар кўпчилик бўлиб келгани бизга катта куч берди. Улар биздан яхши натижа кутди, биз ҳам уларни хурсанд қилиш ниятида майдонга тушдик.
Бироқ учрашувнинг илк қисмидаёқ вазият ўзгариб кетди — жамоа футболчиси Азим Аҳмедов тўғридан-тўғри қизил карточка олиб, майдонни тарк этди.
— Бир киши кам бўлиб қолиш — ҳар қандай жамоа учун синов, — деди Жўраев. — Аммо шунга қарамай, ўйинчиларим таслим бўлмади. Улар доим ҳужумкор ўйнашга ҳаракат қилишди, рақиб дарвозасига босим ўтказишди. Футболда баъзан камчиликда қолган жамоа ҳам ўзини кўрсата олади, лекин бу сафар охирги дақиқаларда хатолар ўз сўзини айтди. Иккита гол ўтказиб юбордик — бу футболнинг табиий қисми.
Мураббий фикрича, жамоа ўйинида ижобий жиҳатлар кўп бўлган, аммо хулоса чиқариш ва хатолар устида ишлаш зарур.
— Мен жамоа бошқарувига келганимдан бери асосий мақсадим — футболчиларнинг ишончи ва курашувчан руҳини тиклаш. Улар ўйиндан-ўйинга ўзларини кўрсатишмоқда. Бугун ҳам майдонда жон куйдиришди. Лекин бизда ҳали камчиликлар бор — уларни таҳлил қилиб, кейинги тургача бартараф этамиз, — деди мураббий.
Жўраев кейинги баҳс ҳақида ҳам тўхталиб ўтди:
— Кейинги турда бизга осон бўлмайди, рақиб — «Насаф». Улар чемпионлик учун курашяпти. Лекин биз ҳам майдонга чиқиб бор кучимиз билан ўйнаймиз. Мақсадимиз битта — мухлисларимизни хурсанд қилиш. Улар ҳар ўйинда биз билан, улар учун ҳам боримизча ҳаракат қиламиз.
Наманганлик мураббий сўзини жамоасига ва мухлисларга раҳмат билан якунлади:
— Йигитларимга раҳмат, шундай шароитда ҳам охирги кучи қолгунича ўйнашди. Мухлисларимиздан эса миннатдорман — уларнинг қўллаб-қувватлови бизнинг энг катта кучимиз. Биз уларнинг ишончини оқлаш учун майдонда охирги дақиқагача курашамиз, — деди Жўраев.
Шу тариқа, «Навбаҳор» ғалаба қозона олмаган бўлса-да, жамоа майдонда ирода ва характер кўрсатди. Улар учун бу мағлубият сабоқ бўлди, келаси турда эса «Насаф»га қарши жангда барчасини амалда исботлаш имкони бор.
“Zamin”ни Telegram'да ўқинг!
