Самарқанд вилояти Каттақўрғон туманида вужудга келган даҳшатли ҳолат жамоатчиликни ларзага солди. Суд ҳужжатларига кўра, маҳаллий фуқаро Аҳтам Нарзиев (исм ўзгартирилган) ҳомиладор турмуш ўртоғини тириклай чуқурга кўмган. “Дарё” мухбири мазкур иш бўйича суд материалларини ўрганди.
Маълумотларга қараганда, 1995 йилда туғилган Нарзиев илгари уч маротаба судланган бўлиб, 2019 йилда Эътибор Элбекова билан расман турмуш қурган. Оилада уч нафар фарзанд тарбияланаётган эди. Бироқ улар ўртасидаги муносабатлар тез-тез жанжаллар ва зўравонликлар билан кечган.
2021 йил апрел ойининг бошларида Аҳтам уйга маст ҳолда кириб келиб, навбатдаги можарога сабабчи бўлган. У аёлини уриб, жароҳат етказганидан сўнг, уни уйнинг орқа томорқасига олиб чиқиб, қўлига белкурак тутқазган ва “чуқур қаз” деб буйруқ берган. Эътибор ҳомиладорлигини айтса ҳам, эрнинг қаттиқ таҳдидларидан сўнг тахминан тўрт соат давомида икки метр чуқур қазишга мажбур бўлган.
Шундан кейин эр аёлини чиқариб олиш ўрнига бўйнигача тупроқ ташлаб, устига “Жигули” автомашинасини қўйиб қўйган. Аёл уч кун давомида сув ва овқатсиз ҳолдан қолиб, ҳушидан кетган.
Эътиборнинг сўзларига кўра, у ўзини уй ичида ҳушига келган ҳолда топган. Аммо турмуш ўртоғи уни яна уриб, яна чуқурни кўмишга мажбурлаган. Ҳатто у итини селлофан билан бўғиб, пичоқлаган ва “агар айтганимни қилмасанг, сенинг аҳволинг ҳам шундай бўлади” деб таҳдид қилган.
“Мен қўрққанимдан жим турдим. Болаларим учун бу ҳақда ҳеч кимга айтолмадим”, — деган у кўз ёши билан суддаги кўрсатмаси давомида.
Зўравонликдан чарчаган аёл 2025 йил 2 февралда навбатдаги жанжалдан сўнг туман Ички ишлар бўлимига мурожаат қилган. Суд жараёнида у моддий даъво билдирмаганини ва фақат ҳаёти хавфсизлиги учун чора кўришни сўраганини айтган.
Айбланувчи эса айбини тан олиб, пушаймонлигини билдирган ҳамда озодликдан маҳрум этилмасликни илтимос қилган. Бироқ суд уни Жиноят кодексининг 138-моддаси 2-қисми “а, б” бандлари ва 112-моддаси 1-қисми бўйича айбли деб топиб, 3 йил 3 ой муддатга озодликдан маҳрум қилди.
Ҳукмга кўра, жазо қаттиқ тартибли колонияда ўталади. Бу иш оилавий зўравонликнинг нечоғли оғир оқибатларга олиб келиши мумкинлигини яна бир бор кўрсатди.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
