Олий Мажлис Қонунчилик палатаси депутати, “Миллий тикланиш” демократик партияси фракцияси аъзоси Дилноза Азизова болаларга нисбатан жинсий зўравонлик содир этган шахсларга нисбатан жазо чораларини янада қаттиқлаштиришни таклиф этди.
Депутатнинг таъкидлашича, Наманганда содир бўлган охирги фожеа — бу фақат бир педофилнинг разолати эмас, балки йиллар давомида “ахлоқ тузатиш ишлари” деган енгил ифода билан бу жиноятни оқлаб келган тизимнинг юзини очиб берди.
“Бола тақдири билан ўйнаш мумкин эмас. Бу фақат жиноят эмас — бу инсонийликка қарши қўзғолон. Педофиллар жазони ‘яхши хулқ’ баҳонаси билан қисқартириб, кўчада эркин юриши давлатнинг болага бўлган муносабатини кўрсатади. Қонун қоғозда эмас, ҳаётда ҳам қаттиқ бўлиши шарт,” — дея ёзади Азизова.
Унинг фикрича, бу каби жиноятчилар учун кечириш ёки енгиллик берилиши мумкин эмас. 2024 йилда Жиноят кодексига киритилган ўзгаришларга кўра, болаларга нисбатан жинсий зўравонлик содир этган шахсларга жазони енгилроқ турига алмаштириш мумкин эмас. Аммо Азизова бунинг ўзи етарли эмаслигини таъкидлади.
“Болаларни ҳақиқий ҳимоя қилиш учун жазо янада қатъий бўлиши лозим. Менинг таклифим аниқ — болага жинсий зўравонлик қилганлар учун умрбод озодликдан маҳрум этиш жазосини қонун даражасида белгилаш вақти келди,” — деди у.
Депутатнинг таъкидлашича, “Бола миллатнинг келажаги” деган сўз фақат шиор бўлиб қолмаслиги керак. “Агар биз шундай разилларга нисбатан ҳамон юмшоқ муносабатда бўлсак, бу — келажагимизни ўз қўлимиз билан йўқ қилиш дегани,” — деб ёзади Азизова.
Бу баёнот жамиятда кенг муҳокамаларга сабаб бўлди. Кўпчилик депутатнинг ташаббусини қўллаб-қувватлаб, жиноят қонунчилигини қайта кўриб чиқиш ва болалар хавфсизлигини таъминлашни талаб қилмоқда.
Шу тариқа, Дилноза Азизованинг қатъий позицияси фақат бир масала атрофида эмас — у бутун жамият онгини уйғотиш, болалар тақдирига бефарқ бўлмасликка чақириқ сифатида янгради.
