Деновда ота-болага ҳужум оқибатида бир киши ҳалок бўлди

Сурхондарё вилоятининг Денов туманида оғир жиноят ҳолати юз берди. Вилоят Сурхондарё вилояти ИИБ маълумотига кўра, ота ва ўғилга нисбатан содир этилган зўравонлик оқибатида ёш йигит ҳаётдан кўз юмди.

Ҳодиса 27 апрель куни Денов шаҳридаги Боғишамол маҳалласи ҳудудида, автомобил ювиш шохобчаси олдида содир бўлган. Тергов маълумотларига кўра, 56 ёшли ота А.У. ва унинг 32 ёшли ўғли А.А. аввалдан пул муносабатлари сабаб зиддиятда бўлган қариндоши — 37 ёшли жияни Қ.Ш томонидан ҳужумга учраган.

Маълум бўлишича, гумонланувчи жиян ёлғиз бўлмаган. У яна уч нафар шериги — 30 ёшли Т.Ш, 29 ёшли Х.Ш ва яна бир 30 ёшли Т.Ш билан биргаликда жабрланувчиларни калтаклаб, оғир тан жароҳатлари етказган. Ҳодиса давомида улар ўғилни “Gentra” автомашинасига ўтқазиб, номаълум томонга олиб кетишган.

Оғир аҳволда бўлган жабрланувчи шу куни шифохонага ётқизилган. Бироқ уни тиббиёт муассасасига ким олиб келгани аниқланмаган. Шифокорларнинг барча саъй-ҳаракатларига қарамасдан, у 28 апрель куни — воқеадан бир кун ўтиб вафот этган.

Дастлаб ҳолат юзасидан Жиноят кодекси 104-модданинг 2-қисми бўйича жиноят иши қўзғатилган эди. Кейинчалик иш ҳолатнинг оғирлашгани сабабли ушбу модданинг 3-қисми “д” бандига қайта квалификация қилинди. Мазкур моддага кўра, қасддан етказилган оғир тан жароҳати жабрланувчининг ўлимига сабаб бўлса, айбдорлар 8 йилдан 10 йилгача озодликдан маҳрум этилиши мумкин.

Ҳозирда жиноятда гумон қилинган барча шахслар қўлга олинган ва процессуал тартибда қамоққа олинган. Тергов ҳаракатлари давом этмоқда.

Бу воқеа жамиятдаги зўравонлик ва шахсий келишмовчиликлар қандай оғир оқибатларга олиб келиши мумкинлигини яна бир бор кўрсатди. Муаммоларни куч билан эмас, қонун доирасида ҳал қилиш қанчалик муҳим экани яна бир бор намоён бўлди.