Самарқандда банк ходими кредит пулларини ўзлаштирди
Самарқандда банк ходими мижознинг кредит маблағини ноқонуний равишда ўзлаштирган. У 50 млн сўм кредит олиш учун мурожаат қилган фуқарога 17 млн сўм ажратилганини айтиб, қолган 33 млн сўмни ўз эҳтиёжлари учун сарфлаган. Текширув давомида ушбу маблағ қайтарилган, аммо фирибгарлик аломатлари билан жиноят иши қўзғатилган. Мутасаддилар фуқароларни молиявий операцияларда ҳушёр бўлишга чақирмоқда.
Самарқанд вилоятида банк тизимига оид фирибгарлик ҳолати фош этилди. Иқтисодий жиноятларга қарши курашиш департаменти маълум қилишича, тижорат банки ходими мижознинг кредит маблағини ноқонуний равишда ўзлаштирган.
Терговга қадар ўтказилган текширувларда аниқланишича, банк мутахассиси Х.Т. 50 млн сўм кредит олиш учун мурожаат қилган фуқаро Ж.Ш.нинг ишончига кирган. У мижозга гўёки 17 млн сўм кредит ажратилишини айтиб, унинг номига очилган пластик картага аслида 50 млн сўм маблағ туширилишини таъминлаган.
Шундан сўнг, банк ходими мижозни чалғитиб, кредит миқдори 17 млн сўм эканини билдирган ва қолган 33 млн сўмни нақдлаштириб, ўз эҳтиёжлари йўлида сарфлаган.
Текширув давомида ўзлаштирилган 33 млн сўм маблағ қайтарилгани процессуал тартибда расмийлаштирилган. Шунга қарамай, мазкур ҳолат бўйича Жиноят кодексининг 168-моддаси — фирибгарлик аломатлари билан жиноят иши қўзғатилиб, ҳозирда тергов ҳаракатлари олиб борилмоқда.
Мутасаддилар фуқароларни молиявий операциялар жараёнида ҳушёр бўлишга чақириб, банк хизматларидан фойдаланишда расмий маълумотларни диққат билан текшириш зарурлигини эслатмоқда.
Изоҳлар 0
…