Аш қарынға жеуге ұсынылмайтын жемістер

Жемістер ағзаға пайдалы дәрумендер мен минералдарға бай өнімдер болып саналады. Алайда мамандардың айтуынша, кейбір жемістерді аш қарынға тұтыну асқазан мен ішек жолдарының қызметіне кері әсерін тигізуі мүмкін.

Мысалы, цитрус жемістері — апельсин, мандарин, лимон және грейпфрут құрамында қышқыл мөлшері жоғары болғандықтан, аш қарынға жегенде қыжыл немесе асқазанда ашу сезімін тудыруы мүмкін. Әсіресе гастрит немесе асқазан жарасы бар адамдарға сақ болу ұсынылады.

Бананды да аш қарынға көп жеу ағзадағы магний мөлшерін күрт арттырып жіберуі мүмкін делінеді. Бұл кей жағдайда жүрек-қан тамыр жүйесіне қолайсыз әсер етуі ықтимал.

Сондай-ақ, құрма мен алмұрт сияқты жемістер құрамындағы талшықтарға байланысты аш қарынға ас қорыту жүйесінде ауырлық сезімін тудыруы мүмкін. Қарбызды да аш қарынға көп жеу кейбір адамдарда іш өту немесе ыңғайсыздық тудыруы мүмкін.