Сырдария облысының Ширин қаласында ауыр қылмыс орын алды. Бас прокуратураның баспасөз хатшысы Хаёт Шамсутдиновтың мәліметінше, әйел қызғаныш салдарынан туындаған жанжалдан кейін күйеуінің заңды жұбайы мен оның кәмелетке толмаған балаларына шабуыл жасаған.
Оқиға 29 сәуір күні сағат 17:00 шамасында Ширин қаласының аумағында болған. Алдымен Әмір Темір махалласында тұратын әйел мен оның шариғат бойынша күйеуі болып табылатын ер адам арасында қызғаныш салдарынан дау туындаған.
Содан кейін әйел анасының үйінен ас үй пышағын алып, Фарход махалласында орналасқан үйге барған. Ол жерде ол күйеуінің заңды әйелі мен оның екі кәмелетке толмаған баласына пышақпен ауыр дене жарақатын салған.
Салдарынан әйел мен оның 5 жасар қызы оқиға орнында көз жұмған. 3 жасар қыз болса ауыр халде ауруханаға жатқызылды.
Оқиғаға қатысты күдікті оқиға орнынан бой тасалаған. Кейіннен ол ұсталып, тергеуге тартылды. Сондай-ақ, марқұмның отбасында 8 жасар ұл мен 20 күндік сәби қалғаны хабарланды.
Аталған жайт бойынша Қылмыстық кодекстің 97-бабы 2-бөлігінің «а», «в», «ж» тармақтарымен қылмыстық іс қозғалды. Тергеу амалдары жалғасуда.
