Forbes журналы 2025 жылдың ең көп табыс тапқан футболшыларының рейтингін жариялады. Жыл сайын жасалатын бұл тізімде ойыншылардың алаңдағы жалақысы мен жарнамалық келісімдерден түсетін табыстары ескеріледі.
Рейтингтің бірінші орнын тағы да португалдық жұлдыз Криштиану Роналду иеленді. Оның Сауд Арабиясының «Ән-Наср» клубындағы жылдық жалақысы — 230 миллион доллар. Сонымен қатар Nike, Binance және Herbalife сияқты ірі брендтермен келісімдер арқылы ол тағы 50 миллион доллар табыс тапқан.
Осылайша Роналдуның жалпы жылдық табысы 280 миллион долларға жетті. Бұл көрсеткіш оған Forbes тізімінің шыңында қайта тұруға мүмкіндік берді.
Екінші орында — «Интер Майами» сапындағы Лионель Месси (130 миллион доллар), оның 60 миллионы — жалақы, 70 миллионы — жарнамалық келісімдерден түскен.
Үшінші орында — «Аль-Иттихад» шабуылшысы Карим Бензема, оның табысы 104 миллион доллар.
Төртінші орында — мадридтік «Реалдың» жаңа жұлдызы Килиан Мбаппе (95 миллион доллар), бесінші орында — «Манчестер Сити» ойыншысы Эрлинг Холанд (80 миллион доллар).
Қалғандары:
6. Винисиус Жуниор («Реал») — 60 (40+20) млн доллар
7. Мұхаммед Салах («Ливерпуль») — 55 (35+20) млн доллар
8. Садио Мане («Ән-Наср») — 54 (50+4) млн доллар
9. Джуд Беллингем («Реал») — 44 (29+15) млн доллар
10. Ламин Ямал («Барселона») — 43 (33+10) млн доллар
Сарапшылардың айтуынша, Сауд Арабиясындағы жаңа қаржылық саясат пен ауқымды келісімшарттар футболшылардың табыс құрылымына айтарлықтай әсер етуде. Ал Беллингем мен Ямал сияқты жас ойыншылардың тізімге енуі — жаңа буын жұлдыздарының қаржылық тұрғыдан да өсіп келе жатқанын көрсетеді.
Forbes талдаушыларының пікірінше, 2025 жылы футболда коммерциялық келісімдер спорттық жетістіктермен тең маңызға ие бола бастады. Роналду мен Месси әлі де табыс бойынша көш бастап тұр, бірақ Мбаппе мен Холанд сияқты жастар оларға бәсекелестік тудыра бастады.
Бұл рейтинг футболшылардың қаржылық қуатын ғана емес, олардың бренд ретіндегі ықпалын да паш етеді. Роналдуның үздіксіз көшбасшылығы оның әлемдегі ең ірі спорттық тұлғалардың бірі екенін тағы бір мәрте дәлелдеді.
