Барселона клубының өкілдері бұрынғы футболшысы Лионель Мессидің Камп Ноу стадионына күтпеген сапарынан таңданысқа түсті. Футболшы бұған дейін стадионда түскен суреттерін әлеуметтік желілерде жариялаған болатын.
Sport.es порталының Барселона клубындағы дереккөздеріне сәйкес, Мессидің стадионға келуі жөнінде ешкім хабардар болмаған. Аргентиналық футболшының жазбасы әлеуметтік желілер мен жаңалық сайттарында тез тарап кетті, ал клуб басшылығы бұл ақпаратқа сенімсіздікпен қарады.
Мессидің стадионға қалай кіргені әзірше беймәлім болып отыр. Қазір клуб оның бұл сапарында кімнің көмектескенін анықтауға тырысуда.
Футболшыға жақын дереккөздер аргентиналықтың бұл сапарды клубпен келісіп алмағанын және оны өз бастамасымен жүзеге асырғанын растады. Белгілі болғанындай, Месси Камп Ноу стадионына 9 қараша күні кешкі уақытта келген.
Ол 14 қараша күні Испания аумағында өтетін Анголаға қарсы жолдастық ойынға қатысу үшін Аргентина құрамасына қосылады.
