Суперкомпьютер "Арсеналдың" чемпиондық мүмкіндігін бағалады

Лондонның "Арсенал" клубы Англия Премьер-лигасы турнир кестесінде бірінші орынды сенімді түрде ұстап тұр. Жексенбі күні "зеңбірекшілер" "Тоттенхэмді" 4:1 есебімен жеңіп, басты қудалаушысы "Челсиден" алты ұпайға ұзап кетті.

Opta суперкомпьютерінің есептеулері бойынша, Микель Артета басшылық ететін команданың көптен күткен чемпиондық атақты алу мүмкіндігі 75,56% деп бағаланған. Екінші фаворит "Манчестер Сити" (14,3%), ал үшінші орында "Челси" (3,88%) тұр.

"Ливерпульдің" алтын медальді қорғау мүмкіндігі өте төмен – бар болғаны 2,13%. Келесі жексенбі, 30 қараша күні "Арсенал" сырт алаңда "Челсиге" қарсы ойын өткізеді.

"Зеңбірекшілер" 2004 жылдан бері Англия чемпионы бола алмай келеді.