Сауд Арабиясының «Ән-Наср» клубының шабуылшысы Криштиану Роналду тағы бір мәрте спорт әлеміндегі ең ірі қаржылық тұлға ретінде танылды. Sportico дерегінше, 40 жастағы португалиялық жұлдыз әлемдегі ең көп табыс табатын спортшы атанды.
Хабарда Роналдудың жылдық жалақысы 200 млн еуро екені айтылған. Бұған қоса жарнама, демеушілік және өзге коммерциялық бағыттардан түсетін табыстар есебінен футболшының жалпы жылдық кірісі 260 млн еуроға дейін жетеді. Қысқасы, алаңда гол соғады, ал алаңнан тыс жерде “бренд” ретінде де бәсекелестерін артта қалдырып отыр.
Рейтингтің екінші сатысына әйгілі мексикалық боксшы Сауль Альварес орналасты. Ол 2025 жылы жалпы 137 млн еуро тапқан: оның 125 млн еуросы — жалақы, 12 млн еуросы — жарнама және коммерциялық келісімшарттардан. Бокста “соққы” тек рингте емес, сандарда да мықты екені көрініп тұр.
Үздік үштікті «Интер Майами» шабуылшысы Лионель Месси түйіндеді. Аргентиналық жұлдыздың жылдық табысы 130 млн еуро: 60 млн еуро — жалақы, 70 млн еуро — жарнамадан түскен табыс. Яғни Месси үшін коммерциялық бөлік жалақыдан да үлкен үлес болып отыр.
Футболшылар арасындағы үздік ондыққа тағы бір танымал есім — «Әл-Иттихад» шабуылшысы Карим Бензема да кірді. Франциялық форвард 115 млн еуромен (110 млн — жалақы, 5 млн — жарнама) жалпы рейтингте алтыншы орын алды.
Сондай-ақ «Реалдың» шабуылшысы Килиан Мбаппе де тізімде бар: ол 95 млн еуромен (70 млн жалақы және 25 млн жарнама) жалпы рейтингте 12-сатыдан орын алды.
Бір қарағанда бұл сандар “тек ақша” сияқты көрінеді. Негізінде бұл — заманауи спорттың ережесі: нәтиже, медиа ықпал және жаһандық бренд тоғысқан жерде табыс та соған сай ұлғаяды. Ал Роналду әлі де ең биік шыңда — және бұл “шыңды” оңай бере салатын ниеті жоқ, бұл жай ғана факт.
“Zamin”-ді Telegram-нан оқыңыз!
