Еуропа Чемпиондар Лигасының ширек финал кезеңі аясында «Барселона» мен «Атлетико» арасындағы матчтан кейін үлкен талқылаулар пайда болды. Каталон клубы 0:2 есебімен жеңілгеннен кейін төрешінің шешімдеріне қатты наразылық білдіріп, УЕФА-ға ресми шағым түсіру мүмкіндігін қарастырып отыр.
Негізгі даулы сәттердің бірі 54-минутта орын алды. Бұл эпизодта «Атлетико» қорғаушысы Марк Пубиль айып алаңында допты қолымен тоқтатты, алайда бас төреші Иштван Ковач пенальти белгілемеді. VAR жүйесіне жауапты Кристиан Дингерт те бұл эпизодқа араласпады, бұл каталондықтардың наразылығын одан әрі күшейтті.
Сонымен қатар «Барселона» командасы Пау Кубарсидің алаңнан қуылу шешімін де әділетсіз деп есептейді. Футболшы алдымен сары қағаз алды, бірақ кейін VAR араласуынан соң қызыл қағазбен алаңнан қуылды. Клуб басшылығы VAR қай жағдайларда араласуы немесе араласпауы керектігі туралы нақты түсінік жоқ екенін атап өтуде.
Бұдан бөлек, каталондықтардың пікірінше, «Атлетико» жартылай қорғаушысы Коке бірінші таймда-ақ алаңнан қуылуы керек еді.
Дереккөздерге сәйкес, дәл осы даулы жағдайлар «Барселона» басшылығын УЕФА-ға ресми шағым беру мәселесін байыпты түрде қарастыруға алып келген.
Сонымен қатар Diario Sport басылымының хабарлауынша, бас төреші Иштван Ковач Еуропа Чемпиондар Лигасының қалған матчтарына тағайындалмауы мүмкін.
Ақпарат үшін, қарымта матч 14 сәуір күні Мадридте өтеді.
