«Бавария» бош мураббийи Винсент Компани дисквалификация туфайли Чемпионлар лигаси ярим финалининг «ПСЖ»га қарши биринчи учрашувини ўтказиб юборади. Унинг ўрнини вақтинчалик ёрдамчиси Аарон Данкс эгаллайди.
Бу ҳақда Goal.com хабар беради.
Данкс бунгача «Астон Вилла»да ҳам вақтинчалик мураббий сифатида фаолият юритган ва бир марта йирик ғалаба, бир марта мағлубият қайд этган.
Данкс Мюнхен клубида асосан стандарт вазиятлар учун масъул ҳисобланади. Статистика шуни кўрсатадики, «Бавария» бу борада қарама-қарши натижаларга эга.
Жамоа жорий мавсумда ўтказиб юборган 52 та голдан 20 таси, яъни 38 фоизи айнан стандарт вазиятлардан кейин содир бўлган. Бу кўрсаткич Бундеслигадаги ўртача 24 фоиздан анча юқори.
Шу билан бирга, ҳужумда вазият бутунлай бошқача. Компани ўз жамоасини стандарт вазиятлардан гол уриш бўйича Европанинг энг яхшиларидан бири деб ҳисоблайди.
Мюнхенликлар Германия чемпионатида бурчак тўпларидан 13 та гол уришга муваффақ бўлишди. Данкс янги тактикалар яратишда Аржен Роббен ва Франк Рибери давридаги эски усуллардан ҳам фойдаланишини тан олган.
UEFA қоидаларига кўра, Компани ўйин вақтида Данкс билан алоқага чиқа олмайди. У учрашувни трибунадан кузатади ва кийиниш хонасига фақат ўйин тугаганидан 10 дақиқа ўтиб кириши мумкин.
Аарон Данкс ўз фаолиятини 15 ёшида бошлаган ва Англия ёшлар терма жамоаларида Жуд Беллингем ҳамда Жамал Муссиала каби юлдузлар билан ишлаган.
“Zamin”-ді Telegram-нан оқыңыз!
