Германия Бундеслигасында чемпиондықты мерзімінен бұрын қамтамасыз еткен "Бавария" трансфер нарығында қатаң ұстанымын көрсетуде. Мюнхендіктер команданың болашағы зор футболшыларының бірі — Александр Павлович бойынша түскен ұсыныстарды үзілді-кесілді қабылдамады.
Мәліметтерге сәйкес, Испанияның "Реал" және Англияның "Манчестер Сити" сияқты гранд командалары жас жартылай қорғаушыға үлкен қызығушылық танытқан. Алайда «Бавария» басшылығы бұл ұсыныстарды тіпті талқылауды да қаламады.
Журналист Кристиан Фальк (Bild) хабарлауынша, клуб Павловичті болашақ жобаның ажырамас бөлігі ретінде қарастыруда. Әсіресе, бас бапкер Венсан Компанидің қол астында футболшы командада маңызды рөлге ие болып үлгерді.
21 жастағы талант иесі негізгі құрамда нық орын алып, тұрақты әрі сенімді ойын көрсетуде. Ол тек Бундеслигада ғана емес, халықаралық аренада да өзін көрсете білді.
Атап айтқанда, Чемпиондар лигасының ширек финалында "Реал" қақпасына соққан голы оның әлеуетін одан әрі айқын паш етті.
Павлович 2023 жылғы қазан айында клуб академиясынан негізгі командаға тартылып, қысқа уақыт ішінде жанкүйерлердің сеніміне ие болды. Сондай-ақ, ол Германия ұлттық құрамасына да шақырту алды.
Айта кетерлігі, футболшының «Бавариямен» қазіргі келісімшарты 2029 жылға дейін жоспарланған. Бұл клубтың оны ұзақ мерзімді жоспарларына қосқанын білдіреді.
Қысқасы, «Бавария» өз жұлдызын сақтап қалу ниетінде нық тұр. Үлкен клубтардың қызығушылығына қарамастан, Павлович әзірге Мюнхенде қалады — және оның рөлі одан әрі артады деп күтілуде.
