Еуропа футболындағы ең жарқын әрі тартысты кездесулердің бірі — УЕФА Чемпиондар лигасы жартылай финалындағы ПСЖ мен "Бавария" арасындағы бәсеке тек жанкүйерлердің ғана емес, мамандардың да назарын аударды. Голдарға толы өткен матч 5:4 есебімен париждіктердің пайдасына аяқталды.
Аталған кездесуге қатысты пікір білдірген аңызға айналған шабуылшы Тьерри Анри ойынды заманауи футболда сирек кездесетін, қауіп пен тәуекелге толы спектакль ретінде бағалады.
Анридің айтуынша, соңғы уақытта көптеген командалар қауіптен қашып, сақтықпен ойын көрсетіп жүргені үшін сынға алынып келген еді. Алайда бұл жолы алаңда мүлдем басқа көрініс байқалды:
— Біз соңғы кездері тәуекелге бармайтын, дриблингті аз қолданатын командалар туралы айтқан едік. Ал бұл ойында қауіп өте көп болды.
Егер сіз тек қорғаныстық стильді ұнатсаңыз, бәлкім, бұл ойын сізге ауыр тиген болар... Бірақ маған бәрібір!
— деді ол CBS эфирінде.
Франциялық маман, сондай-ақ, бұл ойын футбол жанкүйерлеріне қызықты әрі динамикалық футболдың қандай болатынын тағы бір мәрте еске салғанын айтты. Оның пікірінше, соңғы жылдары қалыптасқан «футбол іш пыстырарлық болып кетті» деген көзқарастар дәл осындай ойындар арқылы жоққа шығады.
— Иә, кәсіби тұрғыдан талдайтын тұстар бар. Бірақ томаша ретінде бұл ойын маған өте ұнады.
Тек маған ғана емес, оны көргендердің барлығына қызық болғанына сенімдімін, — деп толықтырды Анри.
Еске сала кетейік, қарымта кездесу 6 мамыр күні Мюнхенде өтеді. Бұл текетірестің жеңімпазы финалда "Арсенал" немесе "Атлетико" жұбының үздігімен күш сынасады.
Қысқасы, бұл бәсеке футбол жанкүйерлері үшін нағыз шоу болды. Енді барлық назар қарымта ойынға аударылған — ол жерде интрига бұдан да қыза түсетіні анық.
“Zamin”-ді Telegram-нан оқыңыз!
