Өзбекстанның туризм басқару жүйесінде кадрлық өзгерістер орын алды. Бұл туралы Podrobno.uz хабарлайды.
Туризм комитетінің төрағасы Умид Шодиев қызметінен босатылып, оның орнына Абдулазиз Акқұлов тағайындалды. Хабарланғандай, Умид Рустамұлы Шодиев басқа жұмысқа ауысуына байланысты лауазымынан кеткен.
Ол 2023 жылғы 27 шілдеден бастап комитетті басқарып келген. Жаңа төраға Абдулазиз Ұролұлы Акқұлов 1985 жылы туған, Ташкент мемлекеттік экономика университетін бітірген және экономика мен халықаралық туризм менеджменті саласының маманы болып табылады.
Ол әртүрлі жылдары "Өзбектуризм" ұлттық компаниясының жүйесінде басшылық лауазымдарда қызмет атқарған. Сондай-ақ Туризмді дамыту мемлекеттік комитеті төрағасының орынбасары және Туризм және спорт министрінің орынбасары қызметтерін атқарған. Кейінірек ол Өзбекстанның Біріккен Араб Әмірліктеріндегі Төтенше және Өкілетті елшісі болып тағайындалған еді.
Абдулазиз Акқұловтың туризм саласына қайта оралуы арқылы саланың дамуы, халықаралық ынтымақтастықты кеңейту және елдің туризм әлеуетін насихаттау жұмыстары жаңа қарқын ала түседі деп күтілуде.
