«Фенербахче»нинг собиқ футболчиси Линкольн Жозе Моуриньонинг ўзига бўлган муносабатидан норози эканини билдирди. Португалиялик мутахассис Истанбул клубини 2024–2025 йилларда бошқарган. Бу ҳақда euro-football.ru хабар беради.
Линкольннинг айтишича, Моуриньо унга берган ваъдасини бажармаган. Футболчи ижарага «Ҳалл Сити»га кетишидан олдин мураббий билан суҳбатлашиб, у ёзги йиғинга Португалияга чақирилишини эшитган. Бироқ мавсум якунлангач, у йиғинга таклиф кутганида вазият бутунлай бошқача тус олган.
«Ҳалл Сити»даги мавсумдан кейин Линкольн таржимон орқали Моуриньо билан боғланмоқчи бўлган, аммо Жозе мулоқотни рад этиб, масалани спорт директори билан ҳал қилишни айтган. Жамоа Португалияда йиғинда бўлган пайтда Линкольн ҳам Португалияда уйида бўлган, шунга қарамай, мураббий уни Истанбулга юбориб, алоҳида машғулот ўташни буюрган.
Футболчи бу ҳолатни адолатсизлик ва ҳурматсизлик деб баҳолади. У клубга кўп ўйинларда, ҳатто ўз позициясида бўлмаган вазиятларда ҳам максимал ёрдам беришга ҳаракат қилганини, оғир жароҳатдан кейин эса қўллаб-қувватлаш кутганини, бироқ буни ҳис қилмаганини таъкидлади.
«Мен бошқалар каби машҳур футболчи бўлмаслигим мумкин, лекин майдонда доим боримни берганман», — деди Линкольн Fanatik нашрига берган интервьюсида.
Ҳозирда Жозе Моуриньо «Бенфика»ни бошқармоқда.
“Zamin”ни Telegram'да ўқинг!
