Технология оламида яна бир шов-шувли янгилик — Илон Маск бошчилигидаги Tesla футуристик роботакси — Cybercab’ни оммавий ишлаб чиқаришни бошлаганини маълум қилди. Ушбу инновацион электромобиль илк бор 2024 йилда тақдим этилган эди ва ҳозирданоқ катта қизиқиш уйғотмоқда.
Cybercab оддий автомобиллардан тубдан фарқ қилади. Унда рул, тепкилар каби анъанавий бошқарув воситалари умуман йўқ — демак, инсон томонидан жисмонан бошқариш имконияти ҳам мавжуд эмас. Бу тўлиқ автоном бошқарувга асосланган янги авлод транспорт воситаси ҳисобланади.
Илон Маск тақдим этган қисқа видеода ҳайдовчисиз машина конвейердан чиқиб, мустақил равишда ҳаракатланаётгани акс этган. Бу эса компаниянинг роботакси концепциясини амалда синаш босқичига ўтганини кўрсатади.
Автомобил икки ўринли, икки эшикли седан бўлиб, минималистик ва ўта замонавий дизайнга эга. Унда ҳатто анъанавий элементлар — орқа кўриш ойнаси, эшик тутқичлари ва орқа ойна ҳам йўқ. Ташқи кўриниши жиҳатидан у Cybertruck услубини эслатади, аммо анча ихчам.
Энг қизиқ жиҳатлардан бири — эшикларининг “чайка қаноти” каби юқорига очилиши. Бу салонга кенг кириш имконини беради. Олд қисмида эса классик радиатор панжараси ўрнига яхлит панел ва ингичка LED ёруғлик чизиғи жойлашган.
Маскнинг таъкидлашича, Cybercab бошқа Tesla моделларига нисбатан арзонроқ бўлиши кутилмоқда. Илгарироқ у унинг нархи 30 минг доллардан паст бўлиши мумкинлигини айтган эди.
Бироқ муҳим жиҳат ҳам бор: АҚШда бундай тўлиқ автоном транспорт воситаларидан фойдаланиш учун ҳали расмий рухсат олинмаган. Шунингдек, автоном ҳайдаш тизими ҳам тўлиқ такомиллашмаган, бу эса лойиҳанинг оммавий жорий этилишига таъсир қилиши мумкин.
Қисқача айтганда, Cybercab — бу келажак транспортига ташланган катта қадам. Агар барча техник ва ҳуқуқий тўсиқлар ҳал этилса, бу каби автомобиллар шаҳар ҳаракатини тубдан ўзгартириши аниқ.
“Zamin”ни Telegram'да ўқинг!
