"Арсенал" бош мураббийи Микел Артета жароҳатидан қутулган Букайо Сакани Англия Премьер-лигаси чемпионлиги учун курашда жамоага ёрдам беришга чақирди. Ачиллес пайидаги жароҳат сабабли бир муддат сафдан чиққан вингер шанба куни "Нюкасл"га қарши кечадиган муҳим уй учрашувида майдонга тушиши кутилмоқда. Англиялик футболчининг йўқлигида "канонирлар" бешта ўйинда бор-йўғи бир марта ғалаба қозониб, турнир жадвалида пешқадамликни бой беришди. Бу ҳақда Goal.com хабар беради.
Артетанинг таъкидлашича, 24 ёшли футболчи жума кунги машғулотларда аъло кайфиятда бўлган ва жамоанинг энг нуфузли ўйинчиси саналади. Жорий мавсумда Сака асосий таркибда майдонга тушган ўйинларнинг 73 фоизида "Арсенал" ғалаба қозонган. Мураббий ўз етакчисидан чемпионлик пойгасининг ҳал қилувчи паллаларида ўйин тақдирини ўзгартира оладиган ҳаракатларни кутаётганини яширмади.
«Букайо сўнгги йиллардаги энг таъсирли ўйинчиларимиздан бири ҳисобланади. Ҳал қилувчи лаҳзалар келганда, у биз учун ғалабани таъминлайдиган вазиятларни яратишига ишонамиз. У таркибда бўлиши жуда муҳим ва биз ундан тўғри фойдаланишга ҳаракат қиламиз», — деди Артета матбуот анжуманида. Ҳозирда "Арсенал" ва "Ман Сити" очколар ҳамда тўплар нисбати бўйича тенг ҳолатда бормоқда.
Чемпионат якунланишига бешта тур қолганида, Артета ўз шогирдларини ортиқча гап-сўзларга чалғимасдан, бор эътиборни майдондаги натижага қаратишга ундади. Мураббийнинг фикрича, чемпионликка лойиқликни фақат ўйин орқали исботлаш мумкин. Сўнгги олтита ўйиннинг тўрттасида мағлуб бўлган Лондон клуби учун "Нюкасл" устидан қозониладиган ғалаба турнир жадвалидаги ҳолатни яхшилаш учун сув ва ҳаводек зарур.
“Zamin”ни Telegram'да ўқинг! 
