Футбол эксперти Александр Точилин «Евро-Футбол.Ру» нашрига берган эксклюзив интервьюсида FIFA президенти Джанни Инфантинонинг Россия жамоаларига қўйилган тақиқни бекор қилиш ҳақидаги фикрлари, шунингдек, ТҚОЧ Россия спортига қўйилган барча санкцияларни яқин орада олиб ташлаши мумкинлиги ҳақида ОАВда тарқалган хабарларга муносабат билдирди. Бу ҳақда euro-football.ru хабар беради.
Точилиннинг айтишича, бундай қарорга ишонишни истайди, чунки бу мавзу узоқ вақтдан бери муҳокамада. Унга кўра, Россияга нисбатан изоляцияни тугатиш учун Европадан принципиал қадам керак, қолаверса, Россиясиз йирик мусобақаларнинг интрига ва оммабоплиги пасайишини улар ҳам тушунади.
Инфантино Россия жамоаларининг четлатилишини «маʼносиз» деб атагани ҳақида гапирар экан, Точилин бу ҳолат дунёдаги вазият ва Россияга нисбатан икки хил стандартлар мавжудлигини кўрсатишини таъкидлади. Шу билан бирга, у вақт ўтиши билан кўпчилик тақиқнинг ўзи мантиқсиз эканини англаб етаётганини қайд этди.
Эксперт ТҚОЧ санкцияларни олиб ташласа, бу футболга ҳам бевосита таъсир қилиши мумкинлигини айтди. Унинг фикрича, бундай қадам «занжирли реакция»ни бошлаб беради: катта ташкилот прецедент яратади ва кейинроқ бошқа институтлар ҳам ўз қарорларини қайта кўриб чиқишга мажбур бўлади.
Инфантинонинг келажакда сиёсат сабаб жамоаларни мусобақалардан четлатишни қонунан тақиқлаш кераклиги ҳақидаги таклифини Точилин спортнинг асосий шиори сиёсатдан холи бўлиши кераклиги билан изоҳлади. У Россияга нисбатан қабул қилинган қарорлар айнан шу тамойилга зид келаётганини эслатди.
ОАВда FIFA апрел ойидаги конгрессида Россиянинг халқаро турнирларга тўлиқ қайтиши масаласини кўриб чиқиши мумкинлиги ёзилмоқда. Точилин бундай муддатларда қайтиш эҳтимолини инкор этмади ва бу гаплар бекорга пайдо бўлмаётганини, энди ижобий сценарий ҳақида ўйлаш мумкинлигини билдирди.
Шунингдек, у Россия қайтган тақдирда ҳам айрим рақиблар майдонга чиқишдан бош тортиши мумкинлигини тан олди. Бундай вазиятда регламентга мувофиқ интизомий чоралар қўлланиши, жумладан техник мағлубият берилиши бошқа жамоаларга ҳам сигнал бўлишини ва бундай демаршлар охир-оқибат ўзларига зарар келтиришини таъкидлади.
“Zamin”ни Telegram'да ўқинг!
