Букайо Сака мухлиснинг таъсирли хатига жавоб қайтарди

"Беаст Моде Он" подкастининг навбатдаги сонида Арсенал юлдузи Букайо Сака ўзига атаб ёзилган жуда таъсирли хатни ўқиб эшиттирди. Мухлис томонидан йўлланган ушбу мактубда футболчининг клуб учун нақадар муҳим шахс экани ва у ёш мухлислар учун чинакам илҳом манбаи бўлиб хизмат қилаётгани алоҳида таъкидланган. Бу ҳақда Goal.com хабар беради.

Мухлис ўз хатида шундай деб ёзади: "Букайо Сака шунчаки таркибдаги бир исм эмас, у трибунадаги мухлисларни ўрнидан турғаза оладиган футболчи. У – қанот ҳужумчиси қиёфасидаги умид. У ёш болаларга ўз орзуларига ишонишни ўргатади ва ҳар бир ўйинда чин дилдан завқ олиб ҳаракат қилади. Букайо биздан бири ва Арсенал мухлиси учун бу жуда муҳим".

Сака етти ёшидан буён Арсенал тизимида тарбияланиб, клуб академиясидан асосий таркиб етакчисига айланган. Подкаст бошловчиси Адебаё Акинфенва билан суҳбатда 24 ёшли футболчи бу сўзлардан жуда таъсирланганини яширмади.

"Раҳмат, бу жуда гўзал. Хатдаги сўзлардан унинг чинакам Арсенал мухлиси эканини дарров англадим. Биз бирга ўтказган баъзи лаҳзалар мухлислар учун бунчалик катта аҳамиятга эга бўлганини билмасдим. Инсонлардан бундай меҳрни ҳис қилиш жуда ёқимли", – дея таъкидлади Сака.