«Ал-Наср» бош мураббийи Жорже Жезуш Криштиану Роналдунинг навбатдаги учрашувда майдонга тушмаслиги сабабини изоҳлади. Бу ҳақда euro-football.ru хабар беради.
Эр-Риёд клуби чоршанба куни ОФК Чемпионлар лигаси доирасида «Аркадаг»га қарши ўйнайди. Португалиялик юлдуз ҳужумчининг яқин орада майдонга қайтиши кутилаётганди, бироқ бу сафар ҳам у қайдномадан жой олмайди.
«Жадвал жуда тиғиз. Шунинг учун Роналдуга ва асосий таркибдаги бир қатор футболчиларга дам беришга қарор қилдик. Олдинда «Ал-Фатеҳ»га қарши муҳим ўйин бор», — деди Жезуш. Унинг сўзларини Al Nassr Zone келтирди.
Мураббий, шунингдек, Роналдунинг дам олиши янгилик эмаслигини таъкидлади: у Саудия Арабистонидан ташқарида ўтадиган учрашувларда аввал ҳам бир неча бор қатнашмаган.
Саудия чемпионатида «Ал-Фатеҳ» — «Ал-Наср» баҳси шанба, 14-февраль куни бўлиб ўтади.
“Zamin”ни Telegram'да ўқинг!
