Франция терма жамоаси ҳимоячиси Ибраҳима Конате Ливерпул клубини тарк этиши расман тасдиқланди. Мерсисайдликлар собиқ Бундеслига ўйинчисининг кетишини эълон қилганидан сўнг, футболчи ижтимоий тармоқларда мухлисларга ҳиссиётларга бой мурожаат йўллади. "Охирги ўйинда барчангиз билан хайрлашиш имконияти бўлмаганидан жуда хафаман. Ўшанда бу либосни сизларнинг қаршингизда охирги марта кияётганимни билмагандим", — деб ёзди 27 ёшли ҳимоячи Instagram саҳифасида. Бу ҳақда Goal.com хабар беради.
Конатенинг сўзларидан англашиладики, у Ливерпул раҳбарияти билан шартномани узайтириш бўйича музокаралар муваффақиятсиз якунланганидан ҳайратда қолган. Бир неча ой давом этган музокаралар апрель ойида ижобий якунланадигандек кўринган эди. Апрел ўрталарида Ливерпулнинг Эвертон устидан қозонилган ғалабасидан сўнг, футболчи келишувга яқин эканини айтган, бироқ якунда томонлар бир қарорга кела олишмади.
Клуб якшанба куни расмий баёнот бериб, Ибраҳима Конате шартномаси якунлангани сабабли жамоани тарк этишини тасдиқлади. Ливерпул раҳбарияти унга Анфиелддаги фаолияти ва қўшган ҳиссаси учун миннатдорчилик билдирди. Конате 2021-йилда РБ Леипзиг клубидан 40 миллион евро эвазига трансфер қилинган эди. У жамоа билан 2025-йилда Англия Премер-лигаси чемпионлигини ва бошқа бир қатор совринларни қўлга киритди.
"Мен бу ерга катта орзулар билан ёш футболчи бўлиб келган эдим, бугун эса бир умр эсда қоладиган хотиралар билан кетяпман. Ливерпулда ўйнаш мен учун шараф эди", — дея қўшимча қилди ҳимоячи. У энди янги чақириқлар ва янги саҳифа вақти келганини таъкидлади.
Ҳозирда Конатега бир қатор гранд клублар қизиқиш билдирмоқда. ЛЪEқуипе нашрининг хабарига кўра, Челси, PSJ ва Бавария унинг трансфери устида ишламоқда. Шунингдек, Саудия Арабистони чемпиони Ал-Иттиҳад ҳам марказий ҳимоячини ўз сафига қўшиб олишга тайёр турибди.
“Zamin”ни Telegram'да ўқинг!
