Britaniyaning "Morgan" kompaniyasi o'zining eng kuchli seriyali modeli hisoblangan "Supersport 400" rodsterini rasman namoyish etdi. Yangi avtomobil brend tarixidagi eng yuqori texnik ko'rsatkichlarga ega bo'lib, u avvalgi versiyalardan sezilarli darajada farq qiladi.
Avtomobil kapoti ostiga 3,0 litr hajmli, 402 ot kuchiga ega BMW turbo dvigateli o'rnatilgan. Bu ko'rsatkich bazaviy modelga nisbatan 67 ot kuchiga ko'pdir. Dvigatelning aylanish momenti 500 Nm darajasida saqlab qolingan bo'lsa-da, quvvatning oshishi natijasida rodster 100 km/soat tezlikka bor-yo'g'i 3,6 soniyada chiqadi. Mashinaning maksimal tezligi soatiga 290 kilometrni tashkil etadi va u faqat 8 pog'onali avtomat uzatmalar qutisi bilan jihozlanadi.
Muhandislar quvvatni oshirish bilan birga avtomobil vaznini o'zgarishsiz saqlab qolishga muvaffaq bo'lishdi — sportkar og'irligi 1170 kilogrammni tashkil qiladi. Shuningdek, Supersport 400 modeli 19 dyuymli quyma g'ildirak disklari, Michelin Pilot Sport 5 shinalari va yangilangan osma tizim bilan ta'minlangan.
Yangi rodster xaridorlarga ikki xil tom varianti — qattiq va yumshoq yopiladigan qismlar bilan taklif etilmoqda. Yevropa bozorida ushbu sportkarning boshlang'ich narxi 138 958 yevro etib belgilandi.
“Zamin”ni Telegramʻda oʻqing!
