Istanbulda yer ostidan eng yirik yashirin qurol ombori topildi
Istanbulning Pendik tumanidagi yer osti suv omborida dronlar yordamida o‘tkazilgan maxsus operatsiya natijasida yirik yashirin qurol ombori fosh etildi. Tintuv davomida noqonuniy qurol yig‘ish uchun mo‘ljallangan 5 mingga yaqin turli ehtiyot qismlar va mexanizmlar qo‘lga kiritildi. Mazkur jinoiy faoliyatga aloqadorlikda gumonlangan 4 kishi hibsga olinib, hozirda ular ustidan tergov harakatlari olib borilmoqda. Ushbu topilma Turkiyada bir vaqtning o‘zida aniqlangan eng yirik noqonuniy qurol zaxiralaridan biri sifatida qayd etildi.
Turkiyaning Istanbul shahrida keng ko‘lamli maxfiy qurol ombori fosh etildi. Xabar qilinishicha, ushbu yashirin joy Pendik tumanida yer ostidagi suv rezervuari hududida aniqlangan. Bu haqda Hürriyet nashri ma’lum qildi.
Ma’lumotlarga ko‘ra, ombor joylashuvi Istanbul politsiyasi tomonidan olib borilgan maxsus kuzatuv jarayonida, xususan, dronlar yordamida jinoyatchilar faoliyatini nazorat qilish orqali aniqlangan. Shundan so‘ng hududda tezkor tintuv o‘tkazilgan.
Tintuv davomida qurol ishlab chiqarishda foydalaniladigan minglab ehtiyot qismlar qo‘lga kiritilgan. Jumladan, 3 092 dona to‘pponcha detallari, 1 869 dona zatvor mexanizmlari hamda yana ko‘plab turli qurol komponentlari aniqlangan. Mutaxassislar bu qismlar noqonuniy qurol yig‘ish uchun mo‘ljallanganini taxmin qilmoqda.
O‘tkazilgan operatsiya davomida mazkur faoliyatga aloqador bo‘lgan 4 nafar gumondor qo‘lga olingan. Hozirda ular ustidan tergov harakatlari olib borilmoqda.
Rasmiylarga ko‘ra, bu topilma Turkiya hududida shu turdagi reydlar doirasida bir martada aniqlangan eng yirik yashirin qurol omborlaridan biri hisoblanadi. Hodisa mamlakatda noqonuniy qurol aylanmasiga qarshi kurash yanada kuchaytirilayotganini ko‘rsatmoqda.
Izohlar 0
…