Tramp Londondagi muzokaralarni olqishladi: Rossiya-Ukraina muammosi bo‘yicha siljish sezilyaptimi?

Amerika Qo‘shma Shtatlari prezidenti Donald Tramp 23 aprel kuni Londonda o‘tkazilgan muhim muzokaralarga ijobiy baho berdi. Unda Yevropa, Ukraina va AQSH vakillari Rossiya-Ukraina nizosini barqarorlashtirish masalasini muhokama qildi. Muzokaralar to‘g‘risidagi reportajni Fox News telekanali jonli efirda yoritdi.

Oq uyda jurnalistlar bilan bo‘lgan muloqotda Tramp ushbu muloqotni samarali deb baholadi va mojaroni hal etishga xizmat qiluvchi ilk qadamlar tashlanganini qayd etdi.

“Ha, menimcha, muzokaralar yaxshi o‘tdi”, — dedi Tramp. — “Bu muammoni bartaraf etish uchun ikki kuchli va zehnli inson kelishuvga erishishi zarur”.

AQSH, Ukraina va Yevropa – muzokaralar orqasida kim turdi?

Amerika tomonidan muzokaralarda Trampning Ukraina bo‘yicha maxsus vakili Kit Kellog qatnashdi. Ko‘pchilik AQSH Davlat kotibi Marko Rubioning ishtirokini kutgan edi, ammo delegatsiyaga aynan Kellog boshchilik qildi.

Ukraina tomonidan Prezident devoni rahbari Andrey Yermak, Tashqi ishlar vazirining birinchi o‘rinbosari Andrey Sibixa va Mudofaa vaziri Rustem Umerov ishtirok etdi. Fransiya va Germaniya esa uchrashuvga o‘z maslahatchilarini yuborish bilan cheklanishdi.

Qrim va NATO masalalari – muzokaralardagi dolzarb mavzular

Muzokaralar davomida G‘arb OAVga ko‘ra, front chizig‘ini vaqtincha “muzlatish”, Ukrainadan NATOga a’zo bo‘lish istagidan voz kechishni so‘rash, shuningdek, Qrimni Rossiya hududi sifatida tan olish imkoniyati evaziga Kiyevga xavfsizlik kafolatlari berish takliflari muhokama qilindi.

Vashington avvalroq, agar real natijalarga erishilmasa, muzokaralardagi vositachilik rolini qayta ko‘rib chiqishini ma’lum qilgan edi. Kiyev esa o‘z navbatida, Qrimni Rossiyaga tegishli deb tan olish har qanday sharoitda ham mumkin emasligini ta’kidlamoqda.

Qrim: bahs tugagan yoki boshlanmagan?

Rossiya Qrimni o‘z hududi sifatida ko‘radi va bu masala yopiq ekanini ta’kidlaydi. Ukraina esa bu nuqtada pozitsiyasidan qaytishni istamaydi.

Londondagi muzokaralar qanday natija beradi, bu hozircha noma’lum. Ammo siyosiy sahnada shiddatli harakatlar qayta boshlandi. Eng muhimi — tinchlik uchun harakatlar boshlangani o‘zining o‘ziyoq ijobiy belgi sifatida baholanmoqda. “Zamin”ni Telegramʻda oʻqing!