Gretsiya va Albaniya chegarasi yaqinidagi sulfidga boy g‘orda dunyodagi eng katta o‘rgimchak to‘ri topildi, deb xabar berdi Live Science.
Mutaxassislar ma’lumoticha, ulkan yerosti koloniyasi 100 kvadrat metrdan ortiq maydonni egallagan bo‘lib, bu hozirgacha qayd etilgan eng katta o‘rgimchak to‘ri hisoblanadi. G‘or ichi qorong‘u, tor va sulfidli daryo bilan qoplangan. To‘rning ayrim qismlari ipak og‘irligi sababli devordan ajralib tushgan holatda topilgan.
Qizig‘i shundaki, bu ulkan to‘rni yagona jonzot emas, balki bir nechta turga mansub minglab o‘rgimchaklar birgalikda barpo etgan. Asosiy qismi Tegenaria domestica turiga tegishli bo‘lib, taxminan 69 mingdan ortiq jonzotni tashkil etadi. Ular odatda odam yashaydigan joylarga yaqin muhitda hayot kechiradi.
Koloniyada shuningdek 42 mingga yaqin Prinerigone vagans turiga mansub o‘rgimchaklar ham yashaydi. Ular yarim sog‘lom muhitda T. domestica bilan tinchlikda hayot kechirishi noyob holat sifatida qayd etilgan.
Jami 110 mingga yaqin o‘rgimchak yashaydigan bu to‘rda o‘lja sifatida mayda hashorotlar — asosan Tanytarsus albisutus turiga mansub chironomidlar topilgan. Ular soni 2,4 milliondan oshadi.
Olimlar ta’kidlashicha, bu gigant to‘r quyosh nuri kirmaydigan yerosti ekotizimida vujudga kelgan bo‘lib, tabiatdagi eng noyob biologik hamjamiyatlardan biri sifatida baholanmoqda.
“Zamin”ni Telegramʻda oʻqing!
