Yaqin soatlar ichida Yerda magnit bo‘roni kuchayishi mumkin - mutaxassislar uning darajasi G3 darajasiga yetishini kutishmoqda. Bu haqda Rossiya Fanlar akademiyasi Kosmik tadqiqotlar instituti va Rossiya Fanlar akademiyasi Sibir bo‘limi Quyosh-Yer fizikasi institutining Quyosh astronomiyasi laboratoriyasida ma’lum qilindi.
Olimlarning so‘zlariga ko‘ra, hozirda Yer magnitosferasi ancha xotirjam, ammo vaziyat tez o‘zgarib bormoqda. "Ertalabdan boshlab magnit bo‘ronlari qayta boshlandi, ular hozircha past va o‘rtacha G1-G2 darajalarida saqlanib turibdi. Shunga qaramay, katta ehtimol bilan bir-ikki soat ichida ular G3 darajasidagi kuchli hodisalarga aylanadi. Buning alomatlari, afsuski, allaqachon kuzatilmoqda," - deyiladi laboratoriya xabarida.
Magnit bo‘ronlari beshta quvvat darajasiga ko‘ra tasniflanadi: kuchsiz G1 dan o‘ta kuchli G5 gacha. Magnit maydonining hozirgi g‘alayonlari nafaqat quyosh plazmasi bulutlarining zarbalari bilan, balki Yerga yo‘naltirilgan yirik toj teshigining faolligi bilan ham bog‘liq.
Ilgari modellashtirish sayyoramiz quyosh plazmasi bulutining faqat chetida bo‘lishini ko‘rsatgan, shuning uchun bo‘ron G4 darajasidan oshmasligi kutilgan edi. Biroq, bashorat noto‘g‘ri bo‘lib chiqsa va Yerga frontal zarba berilsa, olimlar bo‘ron kuchi maksimal G5 darajasiga ham yetishi mumkinligini istisno qilmayapti.
“Zamin”ni Telegramʻda oʻqing!
