“Al Nassr”ning mashhur hujumchisi, portugaliyalik afsona Krishtianu Ronaldu yana bir bor omma e’tiboriga tushdi — bu safar u ota sifatidagi ehsonkorligi bilan. U 15 yoshli o‘g‘li, kichik Krishtianu Ronalduga “Lamborghini Urus” avtomobilini taqdim etdi.
Futbolchi ushbu hodisani ijtimoiy tarmoqda o‘rtoqlashib, o‘g‘lining yangi mashina yonidagi suratini joylashtirdi. Ma’lumotlarga ko‘ra, atalmish sportkarning bahosi 300 ming dollar atrofida bo‘lib, u dunyodagi eng tezkor va ommabop lyuks krossoverlardan biri hisoblanadi.
Bu sovg‘a nafaqat moddiy jihatdan, balki ramziy ahamiyatga ham ega — u Krishtianu Ronaldu o‘g‘lining o‘sib kelayotgan iste’dodi va ilk muvaffaqiyatlarini tan olganini ifodalaydi.
Eslatib o‘tish joiz, kichik Ronaldu yaqinda Portugaliyaning U-16 terma jamoasi safida Uelsga qarshi o‘yinda debyut golini kiritgandi. Uning o‘yini ko‘plab murabbiylar va muxlislar tomonidan yuqori baholangan.
Ayni damda yosh Ronaldu otasining izidan borib, katta futbolda o‘z nomi bilan tarix yozishni orzu qilmoqda. “Lamborghini” esa go‘yo uning bu yo‘ldagi ilk katta mukofoti va yangi bosqichga qadam tashlash ramziga aylandi.
Muxlislar esa ijtimoiy tarmoqlarda ushbu sovg‘aga turlicha munosabat bildirishdi — ayrimlar otasining bunday saxovatini olqishlasa, boshqalar yosh yigitga shunday mas’uliyatli sovg‘a berish haddan ortiq erta ekanini ta’kidladi.
Shunday bo‘lsa-da, Ronaldu oilasi har doimgidek diqqat markazida. Ular nafaqat maydondagi yutuqlari, balki shaxsiy hayotdagi samimiy munosabatlari bilan ham dunyo ommasi e’tiborini qozonmoqda.
“Zamin”ni Telegramʻda oʻqing!
