Pokiston poytaxti Islomobod markazida kecha kechqurun kuchli portlash sodir bo‘ldi. Hodisa shaharning juda tirband tumanlaridan biri — savdo va ma’muriy binolar yaqinida ro‘y berdi. Portlash oqibatida dastlabki ma’lumotlarga ko‘ra, 12 kishi halok bo‘ldi, yana 21 nafar fuqaro turli darajadagi tan jarohatlarini olgan. Bu haqda politsiya manbalariga tayanib, Geo News xabar tarqatdi.
Hodisa joyiga bir necha daqiqa ichida politsiya, jinoyat-texnik ekspertlar va tez yordam guruhlari yetdi. Jabrlanganlar tezda shaharning yirik shifoxonalariga olib borilgan, ba’zilarining ahvoli og‘irligi ma’lum qilingan.
Hozirda voqea sodir bo‘lgan hudud xavfsizlik kuchlari tomonidan to‘liq o‘rab olingan, atrofdagi binolardagi odamlar evakuatsiya qilingan. Politsiyaning ma’lum qilishicha, portlashning aniq sababi hozircha noma’lum bo‘lib, hodisa joyidan jismoniy dalillar yig‘ilmoqda.
“Hozircha portlovchi qurilmaning turi aniqlanmadi, ammo dastlabki taxminlarga ko‘ra, bu avtomobil ichiga o‘rnatilgan bomba bo‘lishi mumkin. Sud-tibbiy va kriminal ekspertizalar yakunlangach, aniq ma’lumot beriladi”, — dedi politsiya vakili jurnalistlarga.
Mutaxassislar fikricha, hodisa mamlakatdagi huquqni muhofaza qilish tizimiga bosim o‘tkazish yoki aholi orasida qo‘rquv uyg‘otish maqsadida amalga oshirilgan bo‘lishi ehtimoldan xoli emas.
So‘nggi yillarda Pokiston hukumati terrorchilikka qarshi keng ko‘lamli operatsiyalar olib borgan bo‘lsa-da, ayrim chekka hududlarda hali ham jangari guruhlar faoliyat yuritmoqda. Bu voqea esa yana bir bor mamlakat xavfsizlik tizimining jiddiy sinov oldida ekanini ko‘rsatmoqda.
“Zamin”ni Telegramʻda oʻqing!
