13:00 / 10.01.2026

Aktrisa Aysanem Yusupovaning bo‘lajak turmush o‘rtog‘i qanday bo‘lishi kerak?

Aysanem Yusupova turmush qurish haqida gapirganda ham rostini aytadi: “Shu kasbni tanlab, turmushga chiqmaganimdan afsuslanaman”, deydi u. Lekin bu afsus uning yo‘li tugaganini anglatmaydi. Aysanem hali ijod qilishini, baland cho‘qqilarga chiqishini, eng yaxshi rollari oldinda ekanini ochiq tan oladi.

Uning so‘zlariga ko‘ra, agar turmush o‘rtog‘i “san’atni yig‘ishtir” desa, u yig‘ishtira oladi. Ammo Aysanem shu yerda juda muhim savol qo‘yadi: bu inson shuncha yillik mehnatga, oilasining 6-yil o‘qitganiga, kino olamining “qiyin” sharoitida chidab kelganiga arziydimi? Ya’ni masala faqat “turmush” emas, masala — kim bilan turmush, qaysi narsa uchun voz kechish.

Bo‘lajak turmush o‘rtog‘i haqida Aysanemning talablari ham bor.

Uning aytishicha, Avvalo, ruhlar birbiriga mos bo‘lishi kerak. Ko‘zimga qarab ichki holatimni, ko‘nglimda nima kechayotganini his qiladigan, so‘zsiz ham tushunadigan inson bo‘lishi lozim. “Eng muhimi —bo‘ya aytganimdek ruhlar bir-biriga to‘g‘ri kelishi”, deydi aktrisa.

Aysanemning hayotidagi eng og‘ir kunlar esa onasi og‘ir operatsiyani boshdan kechirgan vaqtlarga to‘g‘ri kelgan. U paytlarda qanday yashaganini ham yaxshi eslamasligini aytadi: tabiblar “kech kelibsizlar” degan, “harakat qilamiz, lekin javob bermaymiz” degan og‘ir gaplar aytilgan. Hozir onasi yaxshi, lekin Aysanem uchun onasi hanuz kuch manbai: “do‘stim va sirdoshim — onam”, deydi u.

Aktrisaning yomon odatlari bormi?

— Buni atrofimdagilar ko‘proq biladi. Ko‘pincha nega bunchalik qaysarsiz, deyishadi. Aslida tabiatan kamgapman, rollarda ham ko‘proq kam gapiradigan qahramonlarni tanlayman, odamlarni ham o‘z tabiatimga mos tushadiganlarini tanlab muloqot qilaman . Men “hadeb ochiq bo‘lish”dan ko‘ra, sirliroq bo‘lib, o‘z ishimni aniq bilib qilishni ma’qul ko‘raman, deydi aktrisa.

Aysanem Yusupovaning yutuqlari ham salmoqli. U 2024-yilda “Kelajak bunyodkori” medali bilan taqdirlangan. “Oltin Humo — 2023” milliy kinotaqdimotida u ishtirok etgan “O‘zbek qizi” filmi “Yilning eng yaxshi filmi” deb topilgan, Tojikistondagi xalqaro kinofestivalda esa shu roli uchun “Eng yaxshi aktrisa” sifatida e’tirof etilgan. Shuningdek, Madaniyat vazirligining “Madaniyat va san’at fidokori” ko‘krak nishoniga ham sazovor bo‘lgan.