“Arzanda jonim” qo‘shig‘i bilan muxlislar qalbidan joy olgan xonanda Surayyo Qosimova shaxsiy hayotidagi muhim burilish haqida ochiq gapirdi. U “Yoshlar” telekanaliga bergan intervyusida 18 yillik turmushidan nega ajrashganini bayon qildi.
Xonandaning so‘zlariga ko‘ra, ularning nikohidan ikki farzand dunyoga kelgan va u o‘zini ona sifatida baxtli his qiladi. Shu bilan birga, u oiladagi barcha ayollik vazifalarini sidqidildan bajarganini ta’kidladi.
— Alloh bizga ikki shirin farzand berdi. Men bor imkoniyatim bilan yaxshi ona va ayol bo‘lishga harakat qildim. “Men san’atkorman” deb, uy ishlaridan chetda turmadim. Qiyinchilikda ham, farovonlikda ham birga bo‘ldik, — deydi xonanda.
Surayyo Qosimova ajrashish qarori oson bo‘lmaganini, ammo bu ikki tomon uchun to‘g‘ri yo‘l deb hisoblaganini aytdi. U, ayniqsa, turmush o‘rtog‘ining ota-onasi haqida ko‘proq o‘ylaganini qayd etdi.
— Har bir ota-ona farzandi uchun orzu qilgan kelin bo‘ladi. Balki men ular istagan kelin bo‘la olmagandirman. Shuning uchun turmush o‘rtog‘imga: “Siz men uchun osmondagi oysiz, ammo qo‘lim yetmaydi. Mening o‘rnim yerda”, deganman, — deb eslaydi u.
Ma’lumot o‘rnida, xonanda 17 yil davomida sozanda Husan Qosimov bilan birga yashagan. U avvalgi intervyularida ham bir necha bor ajrashish haqida o‘ylaganini, ammo turmush o‘rtog‘ining sabri tufayli munosabatlar davom etganini aytgan edi.
Surayyo Qosimovaning bu ochiq bayonoti muxlislar orasida turli fikrlarga sabab bo‘lmoqda. Biroq u bu qarorni o‘ylab, anglab qabul qilganini alohida ta’kidladi.
“Zamin”ni Telegramʻda oʻqing!
