Ijtimoiy tarmoqlarda Emre Kiviljim va Yulduz Rajabovaning 15 may kuni bo‘lib o‘tgan to‘y marosimidan lavhalar keng tarqalib, muxlislar e’tiborini tortmoqda.
Tarqalgan foto va videolarda yosh kelin-kuyovning baxtiyor onlar, tantananing ko‘tarinki va fayzli muhitda o‘tgani yaqqol aks etgan. Ayniqsa, ularning bir-biriga bo‘lgan samimiy munosabati va mehr-muhabbati ko‘pchilikka manzur bo‘lmoqda.
To‘y marosimida ko‘plab taniqli san’atkorlar ishtirok etib, bayramga alohida shukuh bag‘ishladi. Biroq kechaning eng yodda qolarli lahzalaridan biri — Ozodbek Nazarbekovning shaxsan tashrif buyurgani bo‘ldi.
Madaniyat vaziri yoshlarni samimiy tilaklar bilan tabriklab, mehmonlar uchun mashhur “Mendirman” qo‘shig‘ini jonli ijro etdi. Ushbu jarayonda mehmonlar ham qo‘shiqni birgalikda kuylab, bayram yanada ko‘tarinki ruhda davom etdi.
Qo‘shiq yakunida Nazarbekov yana bir ta’sirli tilak bildirib, yig‘ilganlarga iliq kayfiyat ulashdi. U so‘zida: “Bu kunlarni ancha yillar oldin niyat qilgan edik, shukrki, Alloh nasib qildi. Endi yana bir niyat — Jaloliddin tug'ib beradi xudo xohlasa”, deya ta’kidladi.
Izohlarda foydalanuvchilar bu kabi samimiy va chiroyli tilak aynan Yulduzga juda mos tushganini, bunday niyat eng yaxshi tilaklardan biri ekanini ta’kidlashmoqda.
Ma’lum bo‘lishicha, Yulduz Rajabova va Emre Kiviljim 2020 yilda birgalikda suratga olingan serial jarayonida tanishgan. Unda Emre bosh qahramon — Jaloliddin obrazini gavdalantirgan bo‘lsa, Yulduz uning sevgilisi Qutlibeka rolini ijro etgan. Serial namoyishidan so‘ng ular o‘rtasidagi iliq munosabatlar haqida shou-biznes olamida turli mish-mishlar tarqala boshlagan edi.
Qayd etish joiz, juftlik joriy yilning 17 fevral kuni Istanbul shahrida nikohdan o‘tgan. Toshkentda o‘tkazilgan tantanali to‘y marosimi esa avvaldan rejalashtirilgani aytilgan edi.
“Zamin”ni Telegramʻda oʻqing!
