Elon Musk asos solgan SpaceX kompaniyasi AQSh Federal aloqa komissiyasiga (FCC) murojaat qilib, qishloq hududlarida internet va ovozli aloqani subsidiyalash uchun ajratiladigan 4,5 milliard dollarlik jamg‘armani yopishni taklif qildi. Kompaniya fikricha, Starlink sun’iy yo‘ldosh tizimi allaqachon olis hududlarda yuqori tezlikdagi internet muammosini raqobatbardosh narxlarda hal qilgan. Bu haqda Ixbt.com xabar beradi.
SpaceX vakillarining ta’kidlashicha, eski davlat dasturlari bugungi texnologik reallikka mos kelmaydi va ortiqcha xarajatlarni keltirib chiqarmoqda. FCC yaqin haftalarda yillik byudjetning 1,6 milliard dollarini tashkil etuvchi ushbu dastur qoidalarini yangilash yoki subsidiyalarni butunlay bekor qilish masalasini ovozga qo‘yishni rejalashtirmoqda.
Hozirgi kunda 249 ta mahalliy operator qariyb 1 milliard dollar subsidiya oladi, biroq ulardan talab qilinadigan internet tezligi Starlink imkoniyatlaridan ancha past. Shu sababli, FCC subsidiyalarni qayta ko‘rib chiqish zarurati borligini tan olmoqda.
Bundan tashqari, Starlink aviatsiya sohasida ham faol kengaymoqda. Yaqinda Emirates aviakompaniyasi o‘z samolyotlarida Starlink texnologiyasini joriy etishini e’lon qildi. Elon Muskning so‘zlariga ko‘ra, yuqori tezlik va past kechikish (latency) tufayli ko‘plab yirik aviakompaniyalar aynan Starlink tizimini tanlamoqda.
“Zamin”ni Telegramʻda oʻqing!
