"Surxon"da umuman sharoit yoʻq edi. Rahbariyat oʻyinimizni emas, natijani tahlil qildi" – Anxel Lopes bilan ochiqchasiga suhbat

"Surxon" sobiq bosh murabbiyi Anxel Lopes bilan oʻz yurtiga ketish oldidan suhbat uyushtirdik.
Unda quyidagi mavzular qamrab olindi:
— "Surxon"dan ketish sababi;
— Coca Cola Superligasidagi iste'folar;
— Hamidjon Aktamovning kelishi;
— Hakamlarning kimgadir yon bosishi holatlari;
— Legionerlar limitining kamligi;
— Oʻzbekistonning etakchi jamoalarida oʻyin uslubi yoʻqligi;
— Top-murabbiy mavjud emasligi.

Quyida mazkur suhbatni batafsil oʻqishingiz mumkin.

- "Surxon"da etarlicha muammolarga yoʻliqqan Anxel Lopesning bosh murabbiylikdan ketishi ham kutilgan, ham kutilmagan boʻldi. Garchi natijalar qoniqarsiz koʻrinish olgan boʻlsa-da, oʻyin borasida yaxshi taassurot qoldirayotgandi...
- "Surxon"dagi faoliyatim davomida oʻzim uchun katta tajriba orttirdim, deya olaman. Bu erga ilk bor fevral oyida kelgandim. "Surxon" men uchun juda qiyin loyiha edi. Chunki jamoa hali hamon oʻz maydonida toʻp tepayotgani yoʻq. Bundan tashqari, men yangi mavsumga tayyorgarlikning yarmida jamoa boshqaruvini qoʻlimga oldim. Jamoani oʻzim tayyorlaganim yoʻq. Shunga qaramay, biz oʻz uslubimizni yaratdik va juda yaxshi oʻyin koʻrsatdik. Klub rahbarlarining meni iste'foga chiqarganini qabul qilishdan boshqa choram qolmadi. Lekin "Surxon" va Oʻzbekiston haqida ijobiy xotiralarga ega boʻldim. Kelajakda yurtingizda yana faoliyat olib borish niyatim bor.

- Odatda katta-katta loyihalar, istiqbolli rejalar tuziladi. Biroq klublarimizda bu aksariyat hollarda oxiriga etmaydi. Siz ham bu loyihaning bir qismi edingiz...
- Bitta kuchli loyihani amalga oshirishingiz uchun ma'lum vaqt zarur. 1-2 oyda barcha narsani oʻzgartirishning iloji yoʻq. Mening boshqaruvimda "Surxon" futbolchilari oʻsishga erishdi, deb oʻylayman. Futbolchilar ham buni sezishdi. Bu men uchun muhim ahamiyat kasb etadi. Futbolchilarning murabbiyga boʻlgan munosabati iliq edi. Hattoki etarlicha oʻyin amaliyotga ega boʻlmagan futbolchilar bilan oʻzaro ziddiyatga bormadik. Agar futbolda oʻsishga erishmoqchi boʻlsangiz, sizga barqarorlik va oʻzingizga nisbatan ishonch kerak. Oʻyin tomonlama yomon toʻp tepmadik. Superligada qolishimizga ishonchim komil edi. Jamoamiz oʻtgan oyda AGMK, "Nasaf", "Navbahor"ga qarshi oʻyinlarda juda yaxshi harakat qildi. Bugundan boshlab "Surxon"da yangi davr boshlanadi.

- "Surxon"dagi sharoitlarni koʻrib yevropalik murabbiy sifatida oʻzingizni boshqa olamga tushib qolgandek his qildingizmi?
- Men uchun juda qiyin davr edi. Fevral oyida klubga kelganimda jamoa uchun minimum sharoitlar yaratilgandi. Mavsum boshidan boshlab Termizda toʻp tepishni talab qildim. Loaqal Toshkentda shugʻullanib, Termizda oʻyinlarimizni oʻtkazishimizni istardim. Buni koʻp bor klub mutasaddilariga aytdim, chunki muxlislar daldasi juda zarur va kerakli omil sanaladi. Stadionda ta'mirlash ishlari olib borilayotgani uchun buning imkoni boʻlmadi.

Statistikaga e'tibor berganda, jamoa oʻtgan mavsum 25 ochko toʻplagan. Shundan 20 ochko uydagi bahslarda qoʻlga kiritilganini koʻrish mumkin. Faqatgina 5 ochko safarda ishlangan. Joriy mavsumda barcha oʻyinlarimizni safarda oʻtkazganimizni unutmaslik lozim. Bunday holat kamtargina "Surxon" uchun qiyinchilik tugʻdirishi tabiiy.

- Iste'foga faqat qoniqarsiz natijalar sabab boʻldimi?
- Mening klubdan ketishim faqat natijaga bogʻliq. Mavsumning dastlabki qismida 13 ochko toʻpladik. Ikkinchi davrada ham kamida shu koʻrsatkichni qayd etishimizga koʻzim etardi. Ammo klub rahbarlari sabr qilishmadi. Ular faqat natijaga qarashdi, koʻrsatayotgan oʻyinimizga emas.

- Bu bilan klub rahbariyati sizga nisbatan adolatsiz qaror qabul qildi, deb oʻylaysizmi?
- Albatta, adolatdan emasdi. Yuqorida aytganimdek, koʻrsatayotgan oʻyinimizni koʻpchilik iliq baholamoqda. Jamoaning tarkibini men tanlamadim. Umuman sharoit yoʻq edi. Gapirishda davom etsam, gap koʻp. Bizning oxirgi 3 ta oʻyindagi natijalarimizga qarab ishdan boʻshatishdi. Toʻgʻri, biz magʻlub boʻldik. Oʻzbekiston Kubogida "Nasaf"ga qarshi bahsda raqibdan yaxshi oʻyin koʻrsatdik. "Navbahor"ga etarlicha muammo tugʻdira oldik. AGMKga qarshi oʻyinda raqib tarkibidagi futbolchilar bir bosh ustunligiga qaramay, biz etarlicha bosh ogʻriq boʻldik. Men jamoa oʻyinidan qoniqdim. Natijaga e'tibor bermadim. "Olimpik" bilan oʻyinda ketma-ket 2 ta qizil kartochka, penaltiga qaramay, oʻz uslubimizdan chekinganimiz yoʻq. Murabbiy sifatida oʻyinni doim tahlil qilaman. Klub mutasaddillari esa faqat natijani tahlil qilishdi. Hattoki mavsumning birinchi oʻyinidan bir kun avval bizda formamiz yoʻq edi.

- Hamidjon Aktamovning kelishi haqida...
- Uni bilmayman. Men uni faqat 2-3 kun koʻrdim. Murabbiylik qilgan paytim hamma qarorlarni oʻzim qabul qilardim. Kimdir rejalarimga aralashishiga yoʻl qoʻymasdim.

- Jamoalarda bir yilda 3-4 marta murabbiy oʻzgarmoqda...
- Stabillik boʻlmasa, oʻsishga erishish qiyin. Agar bitta loyihani boshlasangiz, natija kelishiga ishonishingiz kerak. 1-2 ta magʻlubiyat yoki gʻalabaga qarab, bunga baho bersangiz, albatta rejalaringiz oʻxshamaydi. Bundan tashqari, siz oʻzingiz olib kelgan murabbiyga ishonasizmi yoki yoʻqmi, bu ham hal qiladi. Bu – futbol. Baxtga qarshi koʻp jamoalarda qiyin pallada murabbiyga ishonishda sabr etishmaydi. Gʻalabami yoki magʻlubiyatmi, men uchun muhim emas. Odamiylik va professionallik jihatdan klub bizga ishonadimi yoki yoʻqmi, shu muhim.

- Sharoit yoʻqligi bilgansiz. Klub qanday va'dalar bergandi?
- Bizda juda katta muammolar bor edi. Stadion, klub qarorgohi va hokazo. Mashgʻulot uchun koʻp bor stadion oʻzgatirishimizga toʻgʻri keldi. Toshkent boʻylab biz 4-5 marta mashgʻulot maydonlarini oʻzgartirdik. Toshkent bizning uyimiz emas. Oʻyinlarimiz va mashgʻulotlarimiz uchun stadionlarni ijaraga oldik. Shunga qaramay, mavjud qiyinchiliklarga qarshi kurashishga tayyorlangandim. Har safar jamoamga qaraganimda futbolchilar menga ishonardi, qoʻllab-quvvatlardi. Mening koʻrsatmalarimni soʻzsiz amalga oshirishgani uchun oʻzimda ishonch oshib borayotgandi.

- Oʻzbekistonda hakamlarning qaysidir jamoaga yon bosishi kabi holatlarni sezmadingizmi?
- Agar oʻzbek futbolida sogʻlom raqobat yuzaga kelmasa, futbol hech qachon rivojlanmaydi. Xalqaro maydonga oʻz ta'sirini oʻtkazadi. Hakamlarni davlat miqyosida tekshirish kerak. Oʻzbekistonda mentalitetni tushunish qiyin boʻldi. Osiyo davlatlaridan BAA va Xitoyda ishlaganman. Futbolchilarning yashash tarzi, ruhiyatini tushunib olishga vaqt kerak boʻldi. Oʻzbekistonda 7 oydan beri istiqomat qilmoqdaman.

- "Surxon"ning ertasini qanday koʻrmoqdasiz?
- Ular nima qilmoqchi ekanligini bilmayman. Nimalarni oʻzgartirmoqchi, keyingi murabbiy kimligini bilmayman. Shunchaki bu klubdagi faoliyatimni yakunladim. "Surxon" doim qalbimda qoladi. Oʻzbekistonda futbol albatta rivojlanadi. Oʻzbekiston terma jamoasi Osiyoda eng zoʻrlaridan biri boʻlishi shubhasiz. Bundan tashqari, chempionatingiz sogʻlom muhitga boy tarzda oʻtadi.

- Termizliklar sizga ikkinchi bor taklif bilan chiqishsa, qanday munosabatda boʻlasiz?
- Bu ular menga qanday taklif berishiga bogʻliq. Etarlicha vaqt beradimi yoki yoʻqmi? "Surxon"da ishlash ajoyib boʻldi. Bu klubdagi faoliyatim oxirigacha muxlislar daldasini his qilib turdim.

- Oʻzbek klublari ichida oʻzining aniq uslubi va oʻyin falsafasiga ega jamoani koʻrsata olasizmi?
- Men klublar ichidan "Nasaf"ni koʻrsataman. Ular boshqacha oʻyin namoyish qilishadi. "Nasaf"da barcha sharoitlar bor. Jamoa oʻyinini darvozabondan boshlaydi. Qolgan jamoalarni koʻrib xayron qoldim, chunki top-klublarda ham aniq uslub yoʻq. AGMK, "Navbahor"ga oʻxshagan jamoalar bitta gol urib, himoyaga yotib oladi. Keyingi gol haqida oʻylamaydi. Ularda "A" yoki "B" emas, faqat bitta reja bor. Futbolda jamoaning zaxira rejalari ham boʻlishi kerak. Oʻyindan kelib chiqib murabbiy jamoa oʻyinini oʻzgartira olishi darkor. Oʻylashimcha, bu erdagi futbolchilarning darajasi yuqori. Murabbiylar haqida esa bunday deya olmayman.

- Boshqa klubda ish boshlagan taqdiringizda, uslubingizni saqlab qolasizmi?
- Men oʻz uslubimga ega murabbiyman. Menga koʻproq oʻyinni boshqarish, toʻp bilan, tajovuzkor, hujumkor futbol koʻrsatish yoqadi. Himoyaga yotib olmayman.

- Oʻzbekiston terma jamoasining azaliy orzusi – Jahon chempionatiga chiqish. Sizningcha, dastlab rivojlanish muhimmi yoki toʻgʻridan-toʻgʻri mundial yoʻllanmasini maqsad qilish?
- Oʻzbek futbolchilarining xalqaro tajribasi kengayishi zarur. Mahalliy futbolchilar koʻproq xorijda toʻp tepishsin. Yaxshi saviyadagi chet ellik futbolchilar chempionatingizda oʻynashi lozim. Mahalliy futbolchilarning darajasi oshadi. Futbol – bu jamoaviy sport turi. Agar sizning jamoadoshlaringiz kuchli boʻlsa, siz ham oʻsishga erishasiz.

Hozirgi kunda oʻzbek futbolida "4+1" limiti bor. Buni 7-8 tagacha koʻtarishni oʻylab koʻrilsa, yomon boʻlmasdi. Buning natijasida mahalliy futbolchilar katta oʻsishga erishadilar. Mazkur jihat oʻsishning eng asosiy faktori. Ispan futbolini 1990 yildan beri bilaman. Oʻsha paytlar faqat 3 ta futbolchiga ruxsat bor edi. Buning natijasida Ispaniya terma jamoasi past natijalar koʻrsatdi. Bu limit olinishi natijasida Ispaniya terma jamoasi ancha yuqoriladi, Jahon, Evropa chempionatlarida gʻolib chiqdi.

Xitoyda ishlaganimda 3 nafar legionerdan foydalanish imkoni berilgandi, keyin bu 2 taga tushdi. Ular bu harakati bilan mahalliy futbolchilarning darajasini keskin tushirib yuborishdi. Yurtingizda top-futbolchilar koʻp. Jahon chempionatiga chiqa olmaslik yaxshi futbolchilar yoʻqligida emas, assotsiatsiya tomonidan toʻgʻri ish olib borilmaganida.

- Kelajakdagi rejalaringiz...
- Men yangi chaqiruvlarga tayyorman. Agar Oʻzbekistonda boshqa klubda faoliyatimni davom ettirsam ajoyib boʻlardi. Bu erning mentalitetini bilaman. Chempionat, raqiblardan xabardorman. Qaysidir ma'noda bu er menga begona yurt hisoblanmaydi.

“Zamin” yangiliklarini “Telegram”da kuzatib boring