“Real” qo‘l uzatdimi? Mbappe va jamoadoshlar “Bernabeu”dagi revansh uchun ruhiy tayyorgarlikni boshladi

YECHL chorak finalida futbol olamini larzaga keltirgan natija: amaldagi chempion “Real Madrid” Londonda “Arsenal”dan 0:3 hisobida mag‘lub bo‘ldi. Bu — “qirollik klubi” uchun nafaqat natija, balki ruhiy zarba ham bo‘ldi.

15 marta chempion bo‘lgan jamoa shunchaki taslim bo‘ladimi?

Aslida, “Real” uchun YECHLning bu bosqichi “tanish yo‘l”. Ular tarixda 15 marta musobaqa g‘olibi bo‘lgan. Biroq “Emireyts”dagi natija jamoaning keyingi bosqichga chiqish ehtimolini jiddiy ravishda pasaytirdi.

Shu bois, uchrashuvdan so‘ng Kilian Mbappe, Vinisius Junior, Federiko Valverde va Jud Bellingem kabi jamoa yetakchilari maxsus yig‘ilish o‘tkazishdi.

“Biz — Realmiz!”

La Sexta va El Chiringuito manbalarining yozishicha, yulduz futbolchilar jamoadoshlarini ruhlantirishga harakat qilgan. Ular:
“Biz — Chempionlar Ligasida 15 marta g‘alaba qozongan 'Real' futbolchilarimiz. Buni unutmang!” — deya ta’kidlashgan.

Revansh rejasi tayyor: 15 daqiqada — gol!

Mbappe va boshqa yetakchilar “Santyago Bernabeu”dagi javob uchrashuvining dastlabki 15 daqiqasini hal qiluvchi palla, deb baholashmoqda. Ular jamoadan tezkor gol talab qilishgan. Agar javob o‘yini shunday ruhda boshlansa, “Arsenal” uchun kecha oson kechmasligi aniq.

Jamoa a’zolari ushbu chiqishlarni olqishlar bilan qarshi olgan va “Bernabeu”dagi to‘liq muxlis qo‘llovi bilan imkoniyat hali yo‘q emasligini ta’kidlashgan.

Katta javob uchrashuvi qachon?
“Real” va “Arsenal” o‘rtasidagi chorak finalning javob o‘yini 16 aprel kuni Madriddagi “Santyago Bernabeu” stadionida bo‘lib o‘tadi.

Siz nima deb o‘ylaysiz — “Real” tarixda yana bir mo‘jizaga qodirmi? “Zamin”ni Telegramʻda oʻqing!