2025-yil 30-noyabr kuni Angliya Premer-ligasining 13-turida "Manchester Yunayted" safarda "Kristal Pelas" ustidan 2:1 hisobida irodali g‘alabani qo‘lga kiritdi. Ruyben Amorim jamoasi ikkinchi bo‘limda o‘yinning borishini o‘z foydasiga o‘zgartira oldi.
Uchrashuv ehtiyotkorlik bilan boshlandi, ammo mezbonlar tezroq moslashib, o‘yinga yuqori sur’at kiritishdi. "Kristal Pelas" qanotlar orqali faol hujumlar uyushtirib, Mateta va Sarr orqali bosimni oshirdi.
36-daqiqada mezbonlar penalti evaziga hisobni ochishdi, Mateta ikkinchi urinishda gol kiritishga muvaffaq bo‘ldi. Hisobda ortda qolgan "Yunayted" o‘z ishonchini tiklab, o‘yinni nazorat qilishni boshlab yubordi.
Ruyben Amorim jamoasi Dalot va Fernandes orqali mezbonlarning jarima maydoniga doimiy xavf solib turdi. 54-daqiqada mehmonlar hisobni tenglashtirdi.
Jarima zarbasidan so‘ng to‘pni birinchi bo‘lib qabul qilgan Zirkzee yaqin burchakka aniq zarba yo‘lladi. Keyinchalik "qizil iblislar" o‘z ustunligini davom ettirgan holda faol hujum qildi.
Mehmonlar Mount orqali bosimni kuchaytirishdi. 63-daqiqada ingliz futbolchisi standart vaziyatdan so‘ng past zarba bilan darvozani ishg‘ol qilib, chiroyli gol urdi.
"Kristal Pelas" hisobni tenglashtirishga urindi, lekin mehmonlarning himoyasi ishonchli harakat qildi. Mitchell va Nketia bir necha imkoniyatga ega bo‘lishdi, ammo zarbalari aniq chiqmagan.
"Yunayted" o‘yinning yakunida vaqtni o‘tkazish taktikasini qo‘llab, mezbonlarga hal qiluvchi hujum uyushtirishga imkon bermadi.
Mehmon guruhidagi foydalanuvchilar ushbu nashrga izoh qoldira olmaydi.
