O‘zbekiston milliy terma jamoasi sardori, mahoratli hujumchi Eldor Shomurodov FIFA nashriga bergan eksklyuziv intervyusida tarixiy yo‘llanma va bo‘lajak Mundial haqidagi hayajonli fikrlari bilan o‘rtoqlashdi. Tajribali futbolchimizning ta’kidlashicha, jahon sahnasiga chiqish nafaqat yurtimiz, balki butun Markaziy Osiyo mintaqasi uchun ulkan g‘urur manbaidir.
Butun mintaqaning faxri va e’tirofi
Eldor Shomurodov jahon chempionatiga chiqish xalqimiz uchun qanchalik muhim ekanini so‘z bilan ta’riflash qiyinligini bildirdi. «Bu yo‘llanmani butun O‘zbekiston yillar davomida intiqlik bilan kutgan edi. Natijadan so‘ng nafaqat yurtdoshlarimiz, balki qo‘shni davlatlar, jumladan Qozog‘iston prezidenti ham bizni tabriklagani muvaffaqiyatimiz miqyosini ko‘rsatadi», – deydi u. Sardorning fikricha, agar jamoa Jahon chempionatida munosib ishtirok etsa, o‘zbek futbolining butun dunyo bo‘ylab millionlab yangi muxlislari paydo bo‘ladi.
«K» guruhi va Fabio Kannavaro omili
Jahon chempionatida vakillarimiz «K» guruhida Portugaliya, Kolumbiya hamda Kongo DR, Yamayka yoki Yangi Kaledoniya terma jamoalaridan biriga qarshi bahs olib boradi. Uchrashuvlarga Mexiko, Xyuston va Atlanta kabi mashhur shaharlar mezbonlik qiladi. Jamoamizga afsonaviy Fabio Kannavaro ustozlik qilayotgani futbolchilarimizga qo‘shimcha ishonch bag‘ishlamoqda.
«Guruhdagi raqiblarning kimligi biz uchun ikkinchi darajali masala. Asosiy vazifamiz — guruh bosqichidan muvaffaqiyatli o‘tish. Bizni autsayder deb hisoblaydiganlarning tasavvurlarini maydondagi o‘yinimiz bilan parchalab tashlaymiz», – deya qat’iy ta’kidladi Shomurodov.
Turkiyadagi muvaffaqiyat va Yevropa tajribasi
Ayni damda Turkiyaning «Bashakshehir» klubida ijara asosida to‘p surayotgan Eldor mavsumni ko‘tarinki ruhda o‘tkazmoqda. U 17 ta uchrashuvda raqiblar darvozasini 12 bor ishg‘ol qilib, 3 ta golli uzatmani amalga oshirgan holda to‘purarlar poygasida peshqadamlik qilmoqda. Faoliyati davomida «Roma» bilan Konferensiyalar ligasi kubogini qo‘lga kiritgan ilk o‘zbek futbolchisi sifatida u Ronaldu yoki Xames Rodriges kabi yulduzlardan hayiqmasligini aytdi.
Infratuzilma va yangi avlodga yo‘l
Shomurodov so‘nggi yillarda O‘zbekistonda futbolga, ayniqsa yoshlar akademiyalari va infratuzilmaga qaratilayotgan e’tibor o‘z mevasini berayotganini qayd etdi. «Biz Yevropa jamoalarida o‘ynashga qodir ekanimizni isbotladik. Bugungi kunda ko‘plab futbolchilarimiz kuchli ligalarga yo‘l olmoqda, bu esa milliy terma jamoamizning umumiy saviyasini oshiradi», – deydi hujumchi.
Amerikadagi «o‘zbek desanti»
Sardorning fikricha, okean ortida bo‘lib o‘tadigan o‘yinlarda mahalliy muxlislar va AQSHda istiqomat qiluvchi vatandoshlarimizning daldasi hal qiluvchi ahamiyatga ega bo‘ladi. O‘zbekistondan ham minglab ishqibozlar ushbu tarixiy voqeani o‘z ko‘zi bilan ko‘rish uchun Amerikaga borishni rejalashtirmoqda.
Sizningcha, O‘zbekiston terma jamoasi Portugaliya va Kolumbiya kabi grandlarga qarshi qanday natija ko‘rsata oladi?
“Zamin”ni Telegramʻda oʻqing!
