Toshkent shahrida jangovar o‘q-dorilarni pullab yubormoqchi bo‘lgan shaxs qo‘lga olindi. Bu haqda Ichki ishlar vazirligi rasmiy ma’lumot berdi.
Ma’lum qilinishicha, Chilonzor tumanida o‘tkazilgan tezkor tadbirlar davomida 2001 yilda tug‘ilgan fuqaro xaridorga 1 300 AQSh dollari evaziga 22 dona, kalibri 5,45 millimetr bo‘lgan jangovar o‘qlarni sotish paytida ushlangan. Ashyoviy dalillar belgilangan tartibda rasmiylashtirib olingan.
Tekshiruvlar davomida ushlangan shaxs muqaddam Surxondaryo viloyatidagi harbiy qismda portlatuvchi-haydovchi sifatida faoliyat yuritgani aniqlangan. Shuningdek, u mazkur o‘q-dorilarni avval birga ishlagan harbiy xodimdan 10 million so‘mga sotib olgani aytilmoqda.
Holat yuzasidan gumonlanuvchiga nisbatan Jinoyat kodeksining tegishli moddalari asosida ish qo‘zg‘atilib, hozirda surishtiruv va tergov harakatlari olib borilmoqda.
Eslatib o‘tamiz, avvalroq turli hududlarda portlovchi modda va qurol-aslahaga oid shubhali holatlar ham qayd etilgani haqida xabarlar tarqalgan edi.
“Zamin”ni Telegramʻda oʻqing!
