INEOS va ser Jim Retkliff “Manchester Yunayted”ning sport yo‘nalishidagi boshqaruvini qo‘liga olganiga qaramay, klubning asosiy aksiya paketi hali-hamon Joel va Avram Gleyzerlar nazoratida qolmoqda. Shu sabab, klub atrofidagi har qanday harakat muxlislar e’tiborini tortadi — ayniqsa, derbi arafasida.
Odatda omma oldida deyarli ko‘rinmaydigan klub hammuassislari aynan Maykl Kerrikning debyuti oldidan Manchesterga kelishi haqida xabarlar tarqaldi. “TalkSPORT” ma’lumotiga ko‘ra, 2005 yilda “Manchester Yunayted”ni sotib olgan Malkom Gleyzerning o‘g‘illari “Manchester Siti”ga qarshi bahsdan oldin shaharga yetib kelgan.
Manbada ta’kidlanishicha, bu tashrif tasodif emas. Gleyzerlarning Manchesterga kelishi Retkliff va uning jamoasi duch kelayotgan tashkiliy muammolar, klub ichidagi yo‘l xaritasi va kelajak strategiyasi bilan bevosita bog‘liq bo‘lishi mumkin.
Xabarlarga ko‘ra, ular maxsus uchrashuvda ishtirok etadi. U yerda yangi bosh murabbiy bilan yaqindan suhbat o‘tkazilishi, shuningdek, Retkliff tomonidan yo‘lga qo‘yilayotgan boshqaruv modeli va klubning uzoq muddatli rejalari muhokama qilinishi kutilmoqda. Qisqasi, gap oddiy “ko‘rib ketish” emas — gap katta qarorlar havosida.
Albatta, bunday yig‘ilishlar joriy mavsumda “qizil iblislar” taqdiriga qanday ta’sir qilishi hozircha noma’lum. Biroq derbi oldidan yuqori darajadagi bunday harakatlar klub ichida nimadir jiddiy tarzda qayta ko‘rib chiqilayotganidan darak berishi mumkin.
Eslatib o‘tamiz, Manchester derbisi ertaga soat 17:30 da start oladi. Muxlislar esa maydondagi natijadan tashqari, klub ichida qabul qilinadigan qarorlar ham “Yunayted” kelajagini qaysi tomonga burishini diqqat bilan kuzatadi.
“Zamin”ni Telegramʻda oʻqing!
