Navoiylik 5-sinf o‘quvchisi inglizdan B2 oldi

Navoiy shahridagi 22-umumta’lim maktabining 5-sinf o‘quvchisi Islombek Mansurov ingliz tilidan B2 darajadagi milliy sertifikatni qo‘lga kiritdi. Bu haqda viloyat Maktabgacha va maktab ta’limi boshqarmasi ma’lum qildi.

Qayd etilishicha, Islombek ushbu natijaga ilk urinishdayoq erishgan. Yoshini hisobga olganda, bu ko‘rsatkich mamlakat miqyosida eng yuqori natijalar qatorida qayd etilishi mumkin.

Boshqarma axborotida ta’kidlanishicha, bu yutuq yoshlar orasida chet tillariga qiziqish oshib borayotganini ko‘rsatadi. Shuningdek, to‘g‘ri yo‘naltirish va mehnat bilan hatto katta maqsadlarga ham erishish mumkinligi yana bir bor isbotlandi.

Eslatib o‘tamiz, oliy ta’lim muassasalariga hujjat topshirishda chet tilidan B2 sertifikatiga ega abituriyentlarga belgilangan tartibda maksimal ball beriladi.