«Zenit» va Rossiya terma jamoasi himoyachisi Igor Diveyev ijtimoiy tarmoqlarda yillar avval olingan suratni e’lon qildi. Kadrda 10 yoshli Diveyev Germaniya terma jamoasi futbolchilari bilan birga aks etgan. Bu haqda euro-football.ru xabar beradi.
Suratda Lukas Podolski, Bastian Shvaynshtayger hamda Mesut O'zilni ko‘rish mumkin. Foto 2010 yilgi jahon chempionati saralashi doirasidagi Rossiya — Germaniya uchrashuvi oldidan olingan.
Diveyev o‘sha paytda maydonga futbolchilar bilan birga chiqqanini eslab, bu uning terma bilan ilk bor maydonga chiqishi bo‘lganini yozdi: «Terma jamoamiz bilan maydonga ilk chiqishim! Faqat Podolski, Shvaynshtayger va O'zil bilan birga», — dedi u.
Eslatib o‘tamiz, 2009 yil oktabrida Moskvadagi «Lujniki» stadionida o‘tgan o‘yinda Rossiya Germaniyaga 0:1 hisobida imkoniyatni boy bergan, yagona gol muallifi Miroslav Kloze bo‘lgan.
“Zamin”ni Telegramʻda oʻqing!
